炒股揀股，必須瞻前顧後，對其過去升跌原因全然了解，才可得心應手。聯洲珠寶（926）由03年11月最高2.80元跌到目前低位，原因只有一個，就係美林阻頭阻勢，運用其擁有聯珠可換股債券（CB）優厚條件，猛咁提早行使兼順手沽埋套現賺大錢。小股東沒奈何，惟有忍受，但曙光再現。未買要買，起碼翻半番，中短線皆宜。
CB壓力盡消除
04年初，唔知邊個蠶蟲師爺度橋，聯珠發行CB，集資4500萬美元，所訂條款，益晒美林，本來09年3月底到期，但06年1月24日行使時，行使價竟低至0.9522元，有錢賺自然獲利回吐，沽壓長期存在，聯珠有乜辦法唔長期跑輸大市、跑輸母公司聯洲國際（048）？
睇聯珠中期報告第24頁，內有黃金屋，話明到06年1月27日，美林手上所有CB全部行使，美林今後無權再要求聯珠發行新一批CB，即09年3月底到期一批已全部提早行使，再無後顧之憂。美林雖仍持有1366萬股認購權（SubscriptionRights），有別於CB，09年3月才到期，但平均行使價達1.96元，股數少兼高過市價甚多，阻力已形同虛設，無足畏懼。
歐洲股神睇中
阻力消除，推動力在凝聚中。美林1月27日披露持有2788萬股，佔發行股本6.36%，至今未再賤售，但新動力來自一個名為ForumEuropeanSmallcaps嘅歐洲基金。呢個基金97年成立，由哈佛商學院高材生BurkhardWittek博士揸弗，打理兩大家族基金，Size保密，一直只投資歐洲股票，係典型「價值型投資者」（ValueInvestor），同股神畢菲特同路，有歐洲股神雅號，如非有極大上升潛力與風險極低，不會隨便郁手，今次首次東來揀中聯珠，與聯珠本身係歐洲珠寶公司關係最大。新力量足以抵銷美林無眼淚式掟貨行動有餘；供求關係逆轉，股價只有向上一途。
聯珠基本因素一流，03年11月升至2.80元時，PE造15倍。05年（5月年結）每股盈利0.203元，現價PE僅7.3倍。06年上半年賺5258萬元，已係05年全年盈利7460萬元嘅70%，預測全年賺達1億元，增34%，每股盈利0.23元（因美林不斷行使CB，發行股本由04年5月初3.10億股，增至目前4.505億股），現價PE只有6.5倍，與母公司10.5倍PE比較，大幅落後，與歐洲珠寶股平均PE19比較，筍晒，難怪Forum郁佢！
NAV方面，更筍，聯珠NAV每股1.61元，P/B僅0.9倍，相對聯洲NAV1.37元，現價2.475元，P/B1.8倍，當然吸引。通常子公司貴過母公司，PE與P/B都如是，例如和黃（013）一直都貴過長實（001），現今難得有機會調轉，聯珠平過聯洲，聯珠更加抵買。
結論：StrongBUY
聯珠由今日起易升難跌，主要係供少求多。聯洲揸聯珠54.63%，Forum揸5.37%，唔計美林持有6.36%，街貨只有40%，市值2.6億元。歐洲基金已有第1個Forum殺到，會否有第2、第3個，不妨拭目以待。聯珠主席史璧加係德國人，聯珠業務重點在歐洲，已被視為本港掛牌嘅歐洲珠寶股，吸引過半隻歐洲成衣股思捷環球（330）！
以10倍PE為基本目標，聯珠見2.30元，可升60%，結論只有一個StrongBUY！
高彰坡