Raymond（周漢文）其家族所豢養的馬匹「爪皇凌雨」，奪得去年打吡大賽冠軍，原來Raymond本身及其家人，更是平治（Benz）車系的多年不二之臣，究竟豢養馬匹跟用車有否相近的心得，Raymond認為，除了車本身的安全性，還要像馬一樣睇血統。
記者：陳偉林
攝影：陳偉強
初擁Benz跑好勝撞車
Raymond（周漢文）眼中的自己，並不如外界般認定是一個從小熱愛馬匹的人，正如一般土生土長的小伙子，年輕時期也有反叛性格，Raymond早已愛上駕車的速度感，而家人為免他開快車生意外，Raymond媽咪寧願將佢心愛的Benz跑給他駕駛，皆因Raymond父母眼中的平治（Benz）車，車身紮實同底盤結構，有安全感又可靠嘛！可能係路面駕駛經驗尚淺的原因，初嚐駕駛不久的Raymond，首度將自己擁有的Benz跑撞得TotalLoss呢！
四門寶馬成自購車
雖然有撞車的前科，但遠赴外地求學的Raymond，仍然好抗拒用Benz車，嫌佢個樣老餅又唔辣，跟家人的一番角力下，Raymond終於得償素願，買得一輛非平治的寶馬BMW535iA；及後，Raymond又在一次大風雪的情況下，於高速公路上因跣胎而撞車，但Raymond仍然有大無畏的精神，在家人難以管束的環境下，Raymond更追上當時的用車潮流，先後擁有過豐田MR2、萬事得RX-7等多款當時得令的日本車。
車同馬都要看參考系數
在外求學期間，Raymond話大概係1987年左右，閒餘的課外活動他選擇了騎馬，從那時開始他對馬匹加深了認識，亦開始喜歡上馬兒愛自由的性格；他認為要揀到一匹好座駕，深入研究部車的特性同長處係好重要，若然有意買部跑車的話，咁就無可能挑選一輛以舒適性為依歸的四門轎車款，而馬匹本身有否優良的血統，亦會係一個好重要的參考因素，之不過Raymond話愛看汽車的新資訊多過睇馬匹血統紀錄，皆因汽車的操控盡掌握在駕駛者手中，而馬匹競賽有否好表現，除先天條件，仲要睇馬主後天怎樣去栽培，真係一種好深的學問㗎！
心境成熟欣賞平治
自小出入均以Benz車代步的Raymond，年紀漸大，心境亦有唔同。現今心目中至有內涵的車款，是當年媽咪的心愛Benz跑，「當年好抗拒Benz，𠵱家睇落好有個性又跑得。」平日以兩部平治S320同S500代步的Raymond，閒時喜歡自己駕駛落地數月的黑色SLK350，前往馬場及探訪愛駒，看來Raymond對馬匹及平治車有一種特殊情意結。
世界馬王「爪皇凌雨」小檔案
1.首匹榮登「世界馬王」寶座的香港賽駒。
2.2005年度Mercedes-Benz香港打吡大賽冠軍。
3.國際一級賽國泰航空香港盃冠軍。
4.國際一級賽愛彼錶女皇盃冠軍。
5.香港冠軍暨遮打盃冠軍。
過往賽績：出賽13次（7冠1亞2季）
累積獎金：39,915,500港元
*現時「爪皇凌雨」正身處新西蘭放草。
香港打吡賽馬係啲乜？
原來，香港打吡大賽係本地歷史最悠久的經典賽馬運動，今日在沙田馬場舉行嘅係第129屆賽事的大日子，賽程有2,000米，總獎金高達1,400萬元，是本地馬圈的一級賽，只准四歲馬匹參加；一直以來都是馬主、練馬師及騎師矢志爭逐的本地馬圈最高榮譽比賽。