單從表面數字看，恒指今個星期跌85點，高位15973，低位15618，全周波幅354點，並無特別，應該和「飄忽」拉不上關係，但實際上，本周大市不但走勢飄忽，而且殺機重重。
港股周一挑戰萬六關受阻，連續兩日守在15900之上收市，似蓄勢再試，但周三午市，期指突然急插，大跌264點收市，翌日卻大幅反彈190點，昨日又跌87點，一個唔好彩企錯邊及轉錯軚，真係隨時左一巴右一巴輸到暈。
趙飛雲有多個玩期指及窩輪的資深股友，今個禮拜皆被左一巴、右一巴地摑到滿天星斗，他們都表示輸錢是其次，最慘是輸得不明不白。
現時太多對沖基金在港搵食，好多時真係唔清楚佢哋點玩，一般散戶最好都係暫時避開期指及窩輪這類衍生工具的買賣。
中資股韌力足
中資股暫時仍炒人民幣升值概念，望落韌力十足，H指2月尾升至6794點高位後，調整2個星期又再升過，H指昨升37點，收6600，又逐漸逼近6794的高位，睇嚟H指下周有機會挑戰6794的高位。大市遲遲未展開調整，亦可能和中資股未做完嘢有關，提防H指期貨結算完後，中資股走勢亦會走樣。
以注碼控制風險
另外一些令人較為擔心的現象，就是連三四線股亦炒到一些藍燈籠分子，反映資金追落後已到揀無可揀的地步，過往這是大調整展開前的常見現象。不過，這又是最易贏錢的時候，過早離場會錯失很多機會，其實過猶不及。
趙飛雲過往較謹慎，看見有一些見頂訊號出現後便離場觀望，錯失不少贏錢機會。今年要爭取佳績，所以決定進取些，以注碼及紀律來控制風險，待舔完刀鋒上最後一滴血才離場。
港股大市分析及股份推介，下周一再談。
趙飛雲