細價股繼續輪流炒，昨日就輪到久違咗嘅聯合集團（373）系股份，阿媽聯集升14.05％至13.80元、聯合地產（056）升12.17％至6.45元、新鴻基公司（086）升9.87％至4.175元，連天安中國（028）亦升10％，收4.40元。
經紀陳話，根據多年炒股經驗，大市炒到咁上下，好多滄海遺珠就會陸續被發掘，聯集系股份次次都唔例外，而次次都係炒私有化概念，炒股價較資產淨值折讓大。
全系股份中，最大成交係天安，因為公司做大陸地產生意，係近期最當炒嘅類別。現時好多大陸地產股已經炒到過晒火，天安今次急升，只係追落後，而天安跑先同系股份亦有道理。
同樣係大陸地產股，剛剛公布向南豐資源發行3000萬美元可換股債券的沿海家園（1124）昨日復牌，由於債券換股價行使價只係0.40元，較停牌前收市價0.82元折讓相當大，所以股價急跌15.85％，收0.68元。
經紀黃話，隻股停牌前才勁升，所以批債券換股價先至折讓咁大。
慕容小初