大角嘴港灣豪庭起好咗兩年幾，因為地點吊腳，個商場好難吸引到外邊人幫襯，而住客揸車出入又好麻煩。為咗解決問題，香港小輪早年積極向政府建議將埃華街同深旺道打通，方便駕車人士由深旺道左轉入埃華街後，再左轉入角祥街，經惠安街、樂群街同福利街，就可以去到個屋苑度。𠵱家所有工程終於完成。
咁究竟比起以前好幾多。香港小輪話，以前啲人如果行深旺道，想嚟商場或入大角嘴，就必須要南行至旺角一帶先可掉頭，會經過多條繁忙街道，路途迂迴，費時失事，兼加重旺角區嘅交通負荷咁話。但𠵱家通咗埃華街就唔同嘞，真係「一為商場，二為住客」，大家得益。唔知咁會唔會令港灣剩番嗰二百幾個貨尾好賣啲呢？