你想邊個電視台播世界盃？當然係免費電視台，今年繼續收費，又在有線，球迷硬要科水睇波，原來波衫店老闆們亦同球迷一樣好想無綫播，點解？因為唔使錢日日播，就連牛頭角個順嫂都知邊個係碧咸！有助多啲人買波衫，都有道理，記得86年那屆，無綫播世界盃，全城沉醉於睇波熱（唔使錢吖嘛！），就連我阿媽都知上帝之手單嘢，同一班師奶喺街市講波……今年唔係無綫播世界盃，佢哋當然唔會幫對頭人宣傳，隻字不提，就算提都只限於新聞報道或臨近世界盃前嘅日子。要宣傳世界盃？我哋樂意到極，由今日起每個星期六我哋都會同大家倒數世界盃，介紹一系列與足球有關的人、事、物、Shopping、趣事、人物訪問樣樣有。
其實我都係寓工作於娛樂，雖然公司沒有派我出Trip飛去德國採訪世界盃，我亦無咁富貴撲到飛去睇波，不過有好多方法可以有機會免費飛去睇世界盃，有好多公司如啤酒商、卡拉OK店、信用卡、零售業都加入世界盃熱潮，除贊助外，分到嘅門票好多都係現兜兜十幾萬攞出嚟買飛機票酒店住宿，搞抽獎吸引大家幫襯，中獎機會雖然渺茫，我都有努力參加，因為機會都唔係等如零，一日有參加，一日都有機會，除非造馬。大家等我好消息，6月放大假去德國睇波！
＠錄合採