噚日聽到嘅喜慶事真係多，有再婚、有新婚，仲有添丁，又有升職。邊個升職？除咗唐英年司長個得力助手之外，仲有公關界強人Fanny黃麗君姐姐（圖）。
話說Fanny服務嗰間國際公關公司GolinHarris噚日通知各方友好，話已經擢升咗Fanny做香港公共事務部主管，負責拓展大中華區業務。佢哋仲話Fanny炙手可熱，能提供明智嘅策略意見，做政治公關頂呱呱。去年星展銀行整爛人哋啲保險箱，就係佢幫手做顧問，卒之搞得妥妥當當；煲呔去年競逐特首，Fanny係競選團兩大公關之一；煲呔贏咗，多少有啲功勞啦。
除咗公關界，傳媒圈中，特別係跑政治新聞嘅，如果唔識呢位阿姐都好打有限囉。佢有幾威水？八方都唔識點形容，唯一敢講嘅係：自問冇有怕嘅八方，都要讓佢阿姐三分。
傳真︰2623-9278
電郵︰[email protected]