大家好記性嘅話，一定記得上年煲呔搞珠三角團，馬丁同肥馬局長開賭，話睇死金勞詹一定會隨團，否則輸十餐飯。
結果平時牙擦擦嘅金勞詹帶挈白鴿黨有十餐飯食，第一餐飯上年已經食咗，好守信用嘅馬仔亨，上個禮拜三就搞咗第二餐飯，喺灣仔福臨門設宴，除咗為內地維權律師抗爭、逢星期三都絕食嘅何俊仁無到，白鴿黨八子到齊晒，仲唔知點解有埋都好為食嘅石禮謙。嗰邊馬仔就同埋冬冬結伴同來，加埋石禮謙，就好似個九鐵小小管理局咁。
咁嗰餐飯，冬冬有冇漏料畀白鴿黨，話會炒黎文熹呢？事關黎生翌日就請辭。答案？當然係無啦，張文光𠵱家諗番都大讚佢哋保密工夫好勁，因為問極都無提過要炒邊個魷魚，石禮謙仲犀利，其間猛話九鐵和諧，見佢咁講，又邊有人諗到有人要被兜走呀？呢鋪可見佢哋幾個都好深藏不露喎。
原來白鴿黨唔少人聽到仲有八餐飯食都叫怕怕，所以已經同馬仔亨講，喺上星期三畫上句號。馬仔亨應該最開心啦，事關又可以慳番荷包咯。
傳真︰2623-9278
電郵︰[email protected]