由吳鎮宇、應采兒同內地女星梁靜合演嘅黑色幽默電影《血戰到底》將於下月初喺內地上映，鎮宇話佢喺部戲裏面有突破性演出，事關有場戲佢係全裸上陣，俾飾演佢老婆嘅梁靜追殺，今次更加係鎮宇從影咁多年以嚟第一次拍全裸戲㖭！
通過電影局審查
梁家輝同成龍曾經先後拍露股戲，今次就輪到鎮宇為藝術而犧牲，加入埋呢個露股行列。負責追斬鎮宇嘅梁靜事後大讚鎮宇工作態度一流，佢話當日拍呢場露股狂奔嗰陣，佢攞住把刀，喺後面搏命追斬鎮宇，鎮宇就一路係咁跑，畫面都幾得人驚，難怪𠵱家《血》片每次搞宣傳，好多人都會將焦點放喺鎮宇個股上面啦！
馮仁昭收到風，話《血》片裏面有唔少暴力色情鏡頭，不過已經順利通過內地電影局嘅審查。早排導演王光利話電影局確實提出過要作出修改，但最後都俾佢哋保留原有嘅戲份，王光利仲話佢好有信心呢套戲絕對唔會令入場嘅觀眾失望。
