唱$1打機，恍如香港機舖傳統，內裏其實充滿學問！好似93年銀會輕啲，部機會當你假銀、唱錢阿叔面前要扮MK，否則包你唱唔過$20（以為你唱錢唔打機也！）、遇着部「神機」唔認銀，你就要加啲「旋」勁先入到等，不過呢啲機舖故事都可能成絕「唱」！
最近行旺角新之城GameZone，發現佢機前放咗部白色儀錶板，起初大家指指點點唔知係乜，最後先知原來係一個快將實施嘅插卡式收費器；其原理同八達通差唔多，先入啲錢、打機插卡、直接扣數，玩完再增值！我諗第一個舉腳贊成者係收銀阿叔，以後場內場外做少好多擔擔抬抬工作，第二個係老闆，以後到$10一鋪都只係數字遊戲，班機民隨時打到破晒產都唔覺！不過，從好處想，以後打機又的確輕鬆好多嘅！
正所謂有人辭官歸故里，有人漏夜趕科場！最近場內大熱的《G1》馬仔機，嚟緊年底會有新版返，據日本消息人士透露，佢個「入錢」方式又係破先例咁特別；佢個「入錢位」簡直可以用黑洞形容！因為閒閒哋三幾十，都可以一手掃落去，而下面則有個類似銀行嘅數銀機，同你計清入銀總數，據睇過試版人士表示，嗰種豪氣法，重爽過玩ShowHand，真抵死！
記者、攝影：朱崇德