政府剛公布的新勾地表內，未有新加入港島區可建商廈的地皮，供應不增，睇嚟新一輪炒賣商廈潮正在醞釀中。唔少租客都好擔心一旦約滿，要面對業主大幅加租，所以呢排有租客忍痛攞錢出嚟自置寫字樓，實行一勞永逸。
喺呢啲租轉買成交中，部份仲係跨區入市㖭。西環干諾道西118號，九樓七至十室，面積3888方呎，連兩個車位，由港島東區租客斥資1088萬元購入，呎價2798。業主本來開價1150萬，雙方傾咗幾個月，跟住買家因為要飛去外地做嘢，停咗一輪，近日返港再傾過。
中原香港商業部營業經理梁嘉榮話，買家見租用嘅單位租約就快到期，所以加快洽購步伐，終以1088萬達成協議。
近期多咗呢類租轉買成交，有租用中環寫字樓嘅投資公司，喺同區買入美國銀行中心四個相連單位，涉資4175萬。另外，好多尖沙嘴租客就選擇喺九龍灣自置寫字樓。喺租金升勢中，呢股風潮會愈嚟愈熾熱，有貨賣者，可能慢慢揀客。
電郵地址：[email protected]