自去年「小飛俠」林燕玲被撬過檔NOW寬頻電視，各位粉絲（Fans）足足等了半年，等到頸都長埋，終於喺今個禮拜開始可以在螢光幕上重見自己的偶像。雖然由原來免費睇偶像到𠵱家要一個月畀二百幾蚊先可以再「相見」，但忠心的粉絲們又點會計較？區區二百幾，畀你囉，一於你過檔時我都過台，誓死相隨！唔單止跟隨轉台速度要快，就連網站製作亦都要同步進行，3月20號開台當日立即有得睇。
記者：黃藹瑩
攝影：陳陶鈞、楊錦文
Pius（TopStylist）@orient4：「雖然有啲人話小飛俠的新髮型有啲老土，但我就覺得絕對冇出事，仲非常襯佢的面形及工作性質。NOWTV開台當日她的髮型好Lady、好Grand，好啱出席呢種場面，佢好識去襯，唔錯。」
Fan屎一：3.20推出小飛俠網站
與NOW333開台同日3月20日推出網站交流區，擺明車馬是為「小飛俠」林燕玲過檔NOW寬頻電視而設。網站才成立不久已有不少網友留言：「小飛俠個新髮型好靚……」、「今期X周刊有林小姐做封面，各位記住買呀！」一心以為這位網主是個瘋狂「小飛俠」迷，問吓佢做了林燕玲的Fans多久？點知唔願上鏡的網主Yan卻極度抗拒小記給她冠上「粉絲」的稱號，「我並不是把主播當是明星的那種人，都是你們傳媒把主播這個神聖的專業明星化。」答案認真反高潮。
其實由「小飛俠」做無綫與趙海珠爭一日之長短之時開始，Yan已經好留意「小飛俠」的一舉一動，過去半年睇唔到「小飛俠」成個人灰晒。Yan的口吻勁有新聞專業Feel，但她卻並不是傳理系學生，「我每天都會看電視新聞報道，又會看報紙，但從來沒有想過要做主播，這份工要很有自信、很有專業、很有魅力，太神聖了！」（原來Yan沒有把主播明星化，只是把她們神化而已！）
網址： http://hk.groups.yahoo.com/group/NOWBNC333/
補錢即開財經台
本身家裏已有裝NOWTV的Yan雖自稱不是「小飛俠」粉絲，但為了睇到林小姐，佢立即每個月畀多$15申請埋財經台，「其實我對財經都唔多認識，不過佢（林燕玲）轉台我都要跟嘛，有得睇吓佢個樣都好。」點解仲要整埋網頁？呢個絕對係Fans行為喎！「我想畀多啲人感受主播們的專業。主播並不是賣樣的職業，只有樣靚是不行的，林燕玲就是有樣、有能力的代表。我開個網頁可讓更多人討論這個專業。」
Fan屎二：$240只看燕玲台
跟阿Yan完全相反，一問偉仔他就立即承認自己是「小飛俠」的超級Fans。雖然他自己的網站「主播物語」中以四位自己鍾情的主播做主題，分別是林燕玲、趙海珠、周嘉儀和張鷺玲，但個人始終最愛「小飛俠」。「為了看她，我唯有花$240申請NOWTV，雖然當中有16個台咁多，但我只看財經台，無辦法啦，唔係因為財經新聞，而係因為林燕玲咋！」好在財經台是24小時的，錯過了的節目有機會翻睇，「我每日都會睇，其實聽得多林燕玲講財經，𠵱家都會有啲興趣，不過仍會上網跟其他網友交流一下。尤其是相片好多時都靠其他網友Cap埋Send俾我。」
話時話，NOW重金挖角林燕玲絕對冇輸蝕，個個Fans唔識財經都盲目申請埋一份，仲未計真正有需要的人士，這次NOW的如意算盤都算打得響！
網址： http://hk.geocities.com/lam_yin_ling/
06主播去向Update版
轉台
無綫＞＞NOW徐蕙儀（首席主播）
無綫＞＞NOW陳凱欣 （首席記者）
無綫＞＞NOW林燕玲（高級主播及記者）
無綫＞＞有線王春媚（主播）
無綫＞＞有線劉紫鳳（曾在無綫任實習記者）
NOW（亞視24小時新聞台）＞＞無綫郭詠琴（主播）
轉行
無綫＞＞現職機管局 魏綺珊
無綫＞＞轉往考評局再離巢 趙麗如
無綫＞＞退休 伍晃榮
亞視＞＞領匯公關 繆美詩
未離巢
趙海珠（無綫）
張鷺玲（無綫）
周嘉儀（無綫）
張美慈（亞視）
曾美華（有線）