今年狗年，係唔少人爭住結婚的好年，最新一單就喺聽日──眼科名醫林順潮嘅婚禮，絕對係城中盛事。
四十六歲嘅林醫生都係時候迎娶佢嗰位華裔女友李肖妮Sharon喇，聽晚佢哋就會喺會展擺酒。大家都知林醫生交遊廣闊，城中唔少名人都係佢客仔，政商醫學各界都有唔少朋友，出席嘅賓客係咁意都一千幾百啦。華華八到林醫生嘅前上司李國章會為一對新人致辭，而陳志雲就任伴郎兼司儀。連前特首董伯伯董建華，同現任特首曾蔭權伉儷都會到賀，不過，呢兩Pair應該係唔同時間嚟，大家前後腳，話唔埋係夾定費事撞到。
早前林醫生已經列出一份禮物清單畀親朋好友，等大家唔使為送禮畀佢而頭痛，當中包括德國古老名牌Fissler嘅廚具，Manterol嘅毛氈、法國名牌Christofle酒杯等。禮尚往來，林醫生亦為一眾賓客準備咗小小紀念品，當中包括有「護眼小錦囊」，以一個小魚缸及一對小金魚，寓意已婚嘅就如魚得水，未婚嘅就早覓佳偶。林醫生咁有諗頭，難怪贏得美人歸。
講起林太，原來Sharon當年參選華裔小姐時，就係林醫生做評判，雖然嗰陣Sharon攞唔到乜嘢獎，但就成為咗林醫生心目中嘅冠軍，就係咁成就一段好事囉！
傳真︰2623-9278
電郵︰[email protected]