是日恒指高低波幅120點，埋單跌54點。滙控（005）、和黃（013）與中銀（2388），總共令恒指唔見53點，包晒全部跌幅。
跌市中仍然有養眼嘢，利豐（494）前日做恒指威水股阿二（升4.3%），昨日做埋阿一，升5.1%，收16.55元，兩日夾埋，升9.6%。利豐唔係散戶玩嘅藍籌，強勁表現代表芬佬逐隻或逐瓣炒，代表個市未死得。
利豐C輪9918：利豐C輪有兩隻，9918成交稍多，收21.1仙，升13%，有4球幾易手，金額唔夠1球。10月尾夠鐘，溢價10.6%，槓桿率7.8倍（有效4.5倍）。數據麻麻，買賣又唔得暢順，隻輪諗唔過。要博，買正股好過，但正股兩日來升幅唔細，都係唔好買。
港交所C輪2268：港交所（388）再升2元，收45.40元，續創新高，C輪自然也文也武，最勁嘅4684升幅32%。上咗龍虎榜做咗阿3。
搵港交所C輪炒，最正路嘅係2268，8月初到期，輪價94仙，負溢價1.4%，槓桿率4.8倍。只不過，港交所預期PE冇30倍都有28倍，仲有冇得去？同外國交易所股票比較，港交所則仍然「偏低」。
文傳公司輪424：文化傳信（343）升10%，收15.9仙，帶埋公司輪424啱啱打入龍虎榜，有51球易手。隻輪明年10月到期，輪價4.2仙，行使價17.2仙，溢價34.6%，槓桿率3.8倍。咁嘅數據買輪，好難贏錢，將啲錢去食咗佢好過。
章盛