創校九十五周年嘅香港大學，今日會喺陸佑堂舉行生日會，請咗三百名嘉賓參加。美心會送一個九十五磅重嘅大蛋糕畀港大。大蛋糕真係好大，長六呎、高三呎，上半部係陸佑堂模型。呢個蛋糕唔食得，但可以擺六個月。
美心老闆伍沾德噚日話，上星期收到港大發展及校友事務部總監徐詠璇來電話想搞到會，佢當時即諗到送大蛋糕。點解咁大手筆呢？伍老闆話，佢以前喺廣州嶺南小、中、大學讀書，喺戰時嶺南校方落嚟借咗港大地方上堂（不過佢當時已離校），所以呢次係為母校回饋港大。
呢個大蛋糕由美心西餅部高級副總餅師馮元康同八名同事趕咗六日起貨，佢話陸佑堂模型最難做，花咗唔少功夫。
傳真︰2623-9278
電郵︰[email protected]