樂壇寶藏：百年樂壇寶藏任睇　冇人知

睇完上幾頁70、80、90年代，真係要講句：往事只能回味。
想回味，當然仲可以睇展覽。上星期有朋友同我講話一定要去「香港影視娛樂博覽」睇睇，全因為佢極冧偉仔。梁朝偉喎！當然吸引到一大班Fans去撐場啦，其實原來影視展舉行的同時，就有一個「香港音樂匯展」，其中一個「中國唱片百年大事記」展覽，就齊集近數十年流行樂壇珍貴史料，甚麼黃霑歌詞手稿、家駒身前結他樣樣集齊，想睇？唔好意思，展覽得3日，而且冇乜宣傳，已經完結咗！

記者：羅灝汶　攝影：伍慶泉

成個展期得3日，仲唔係星期六、日，你話佢宣傳不足咩？佢又有明星撐場，可惜為時已晚！

■好多市民都唔知道有呢一個展覽，大部份都係「搭單」睇埋。

■辛苦借來的歌手服裝，欣賞嘅人過少，希望下次可以有一個更大型嘅展覽啦。

■展覽不算大規模，不過欣賞之後包你大開眼界。

■「中國唱片百年大事記」展覽的留言簿，竟然最後一日展覽才放出來！

同「香港影視娛樂博覽」同一地點、同一時間嘅「香港音樂匯展」「中國唱片百年大事記」展覽，無論宣傳以至規模都遠較影視展細，發起人黃志淙，經過千辛萬苦借來眾多展品，拍攝期間黃志淙就向小記問道：「請問知唔知道，今日有冇其他報章介紹我哋個Show呀？」，簡單的一句說話，正好道出舉辦人的欷歔，短短的音樂歷史走廊，集結了超過二百件珍藏，每件都得來不易。志淙：「呢一張哥哥張國榮嘅金唱片，係哥哥生前嘅最愛，《風繼續吹》絕對係哥哥嘅代表作。淨係安裝哥哥的展品，已經用咗一個鐘頭，而且整個過程都有哥哥嘅家人陪同呢。」可見每件展品是如何珍貴，當中更有霑叔親筆手稿、家駒用過的結他，大部份都未作過公開展覽！

珍貴家駒結他
■志淙：「呢兩支結他都係家強借畀我哋作為展覽品，都係家駒生前嘅最愛，佢生前好多成名作品都係透過呢兩支結他彈奏！」

■志淙：「Beyond自資出版的《再見理想》盒帶，是我的私人珍藏，1986年我仲係讀緊書，喺電台做兼職DJ，我就愛上Beyond嘅音樂，我係第一位喺電台播Beyond嘅DJ。」

■浸會大學學生：「事前我哋完全唔知道有唱片展覽，可能係宣傳不足啦！如果唔係睇影視展都唔會經過，希望政府可以搞一間音樂資料館，我哋一定捧場。」

陳百強粉絲
■鄭小姐：「我係陳百強去世後至開始喜歡佢，今次係好偶然知道有呢一個展覽。我覺得宣傳好唔夠，如果有一個永久地方去存放音樂文物就一定好得多！」

■朱家：「我哋成家人係專誠一齊過嚟睇展覽，如果可以加長展覽時間就好喇，加開星期六、日一定可以吸引多啲人睇啦。」

遊歷過展覽的朋友，都一定會感到意猶未盡，雖然每個收藏櫃都有不同的主題，由遠至近的確令人大開眼界，但只有3日的展出時間，來不及宣傳已經要結束了。採訪當日正是展覽的最後一天，志淙：「香港可以有電影資料館，都應該要有一個地方去收藏音樂資料，辦這個展覽，就是希望可以提起香港人對音樂歷史嘅興趣。」籌備整個展覽只得3個月不到的時間，如果唔係有一班音樂前輩、好友、歌迷會、發燒友及收藏家等人幫助之下，展覽的確難以完成。「我夢想係成立音樂博物館，可以向大眾展示更全面、更仔細、更永久的音樂文物展覽。」

A.志淙：「呢啲就係霑叔親筆手稿、作曲口琴同標誌大眼鏡，全靠霑嫂借出展覽，手稿中的《獅子山下》，經過多次修訂，可見霑叔做事非常認真，當中霑叔包辦曲詞的《我的中國心》更加得到國家表揚證書。」

D.陳百強手稿真係第一次見，當中有家喻戶嘵嘅《漣漪》手稿。

B.金培達於柏林電影節獲得的「金熊獎」都係展品之一；旁為張學友《吻別》大碟於1995年得到的「全球華人銷量大獎」。

C.郭富城喺上年「舞台寶典」演唱會特別訂製的鑽石舞鞋，係第一次公開展出的收藏品。

■《大同新歌選》及歌星電報非常珍貴，由方保羅先生熱心借出，分分鐘你同我嘅阿爺都未見過！

■50年代「百代唱片公司」喺香港設立分公司，到50年後期就吹起「台風」時，寶島歌王青山同姚蘇蓉等人，獨霸香港樂壇！

樂壇寶藏：百年樂壇寶藏任睇 冇人知

樂壇寶藏：百年樂壇寶藏任睇　冇人知