一到世界盃，女朋友紛紛問：「睇波緊要，定陪我緊要？」姊妹們請面對現實，別問自殺式問題，倒不如陪男朋友一齊投入這個四年一度的盛事，反正有靚仔你睇賽事又刺激，再者球衣也不是男士們專利，今年adidas同Nike都推出一系列足球主題女裝，款式一改足球硬橋硬馬感覺，Fashion味好濃，各姊妹又多個藉口添新裝，不過錢──當然由男朋友畀，反正男朋友都預咗輸錢畀馬會㗎喇。
記者：陸伊琳
攝影：伍慶泉
模特兒：Jira（STAZPEOPLE）
自玩Mix&Match
男朋友捧朗拿甸奴，就順他意買黃金巴西隊球衣？黃甘甘好看嗎？別討好男友，就照自己心意買衫，不過……唉，女人總是三心兩意，藍色日本隊小外套好型、英格蘭Tube-Top又好搶眼、自己又鍾情德國隊隊長波歷克……眼前八國聯軍咁多款，怎揀？一於Mix&Match一次過三隊由內至外由上至下着上身！
adidas包羅萬有
今屆世界盃法國、德國、阿根廷、西班牙等國腳會穿adidas球衣，adidas好有商業頭腦，除推出以上球隊的女裝系列外，就連沒有贊助的英格蘭、荷蘭、巴西等屬Nike派球隊，亦為他們推出服裝，有Tee、背心、短裙仔、Jacket等等，款式重幾In，並非運動衫配鬆身褲嗰隻，收晒腰有晒Cuting㗎。
Nike玩復古
Nike則大玩七、八十年代毛巾衫、貼身波衫等懷舊復古款式，最搞鬼就是仿紅魔鬼系列服裝，大大個三叉魔鬼公仔，好曼聯呀！多款得意PrintTee亦諗得過。
（a）i.t.（27369152）
地址：尖沙嘴美麗華購物中心1030店
（b）adidasOriginalsConceptStore（25042186）
地址：銅鑼灣京士頓街6號B舖
