喺17年前，一款名為《天外魔境ZIRIA～遙遠的日邦格》嘅傳統RPG隆重誕生，佢嘅存在意義唔止係為大眾帶嚟上乘娛樂，更係為咗挑戰當時稱霸武林嘅任天堂主機。時至今日業界形勢已大不如前，呢個系列亦出過好幾集，不過《天外》初代其實仲未喺家用機翻出過，如今XB360機主可借呢次機會重新體驗佢精采之處，皆因佢嘅製作班底真係好勁揪！
文：陳福榮
原本出喺8-bit家用機PC-Engine嘅《天外魔境》，係外置配件CD-ROM2首隻RPG作品，對比當年玩緊帶嘅紅白機同世嘉，呢部光碟機絕對係科技先驅，所以帶嚟前所未有嘅震撼－－－真人配音同過場動畫。有配音令玩家猶如睇緊動畫一樣，加上請來名聞世界嘅阪本龍一幫手做配樂，以及《櫻大戰》總指揮廣井王子任創作，呢個班底喺當年真係好殺，幫PC-Engine吸納咗唔少新玩家，令任天堂嗰陣不得不留意光碟呢種媒體！事實上比起《DQ》嘅鳥山明畫風，抑或《FF》力求變化嘅系統，《天外》崛起肯定係一注清泉！
論盡東洋之神秘
如果話同樣由Hudson推出嘅RPG《桃太郎傳說》玩盡日本傳統古仔，咁嘅話《天外魔境》就擺到明將日本傳統以嚟嘅文化一次過晒冷，短時間內同你論盡「東洋之神秘」。呢隻《天外》Remake故事冇咩點改，都係講喺世界東面盡頭有個神秘國度日邦格，經常會有妖怪出沒，而裏面有個蛤蟆族火之勇者自來也，佢為咗幫師傅討伐大門教從而踏上征途。自來也不但會遇上兩名同伴綱手同大蛇丸，仲會畀好多大門教成員暗算，到最後更要阻止勁到爆燈嘅鬥神「將門」復活㖭，都咪話簡單求其。講到呢度相信應該有人會察覺到，點解《天外》咁鬼似𠵱家好Hit嘅漫畫《狐忍》？話晒隻Game都出咗成十幾年，邊個參考邊個應該唔難睇出吖。
全新戰鬥玩連攜
話晒係翻出之作，如果咩都唔改良直接搬字過紙，好似PS2同GC隻二代咁盞俾人鬧，所以今作喺戰鬥方面強化不少；除等同RPG魔法嘅「術」之外，仲設有威力同畫面都唔差嘅奧義招式，舊版完全係兩回事！而XB360機能咁勁，梗唔少得誇張嘅大招，最多可儲20個嘅連攜攻擊，逐下打諗都諗到會有幾勁。另外《天外》亦設有好似《FF》嗰種召喚獸，佢哋係會跟實個角色嚟出，雖然咁變化會少咗，但基於每隻都造到好大，打起嚟依然有嗰種強大壓迫感。
《天外》系列的未來
不如花些少篇幅講吓《天外》呢個系列，佢誕生於1989年，當時係PC-EngineCD-ROM2首個RPG，已獲得不少好評。三年後佢嘅續集《天外魔境II卍MARU》強勢推出，配合機能更強嘅SUPERCD-ROM2與久石讓所做嘅音樂，成為當時口碑兼銷量最好嘅光碟RPG，影響力至今猶在。經過當中十幾年所推出嘅數款外傳作品，喺舊年四月終於推出咗系列正統第三集《天外魔境IIINAMIDA》，然而呢款原本預咗出響PC-FX嘅「劃時代之作」都變成昨日黃花，表現同銷量都未如理想，相信會出第四集嘅機會可謂微乎其微。相比之下，曾經喺超任同SS出過嘅外傳《天外ZERO》及《第四默示錄》反而更有可能移植去PSP或者NDS。
遊戲類型：RPG
對應機種：XBOX360
遊玩人數：1人
開發商：HUDSON
售價：$398
(C)1989,2005HUDSONSOFT
(C)1989,2005RED
