聯通前日公布舊年嘅業績，冇乜驚喜畀到投資者。事關驚喜喺噚日先出現，六位執行董事中有三個起身，包括李秋鴻、盧永仁同葉豐平，而劉韻潔則辭去非執行董事職務，喺4月1日（愚人節）生效。同日，李建國、楊小偉、李正茂、李剛及張鈞安獲委任為執行董事兼副總裁。呂建國出任為非執行董事。
證券行BNP百富勤份研究報告話，管理層喺分析員會議無提到人事變動，好「出奇」佢哋有啲咁落後嘅做法。
不過，當事人之一嘅盧永仁都好識做，佢話自己喺聯通都做咗四年幾，當年定下嘅目標已完成得七七八八，加上舊年業績又平穩番，所以覺得係時候唞吓，諗吓人生下一步點走。佢仲話曾服侍過嘅三個老闆，每人都有唔同特色，可學到唔同嘅嘢。另外，個仔出年正式入學，想多啲陪家人。
雖然未諗到之後點行，但係佢已經諗住將佢嘅紅酒興趣發展為一盤生意，計劃同友人喺上海成立一間紅酒吧，走高檔路線兼會員制嗰隻，若果順利，年底就會開幕。