做張國榮（Leslie）同譚詠麟（阿倫）合唱嗰隻歌，佢全家都媽我，話我唔知畀咗乜嘢毒藥佢食，搞到佢做單咁蝕底嘅嘢。哥哥完咗滾石嘅約之後再返環球，我同佢講話構思咗隻咁嘅碟，所有嘅歌星唱阿倫嘅歌，佢話「咁正？」仲問我幾時同佢做番隻，我話：「你咁後生，遲啲先啦。」我問佢有冇興趣同阿倫合唱，佢話「諗諗先」。呢件事對我簡直係一大考驗，仲要係Leslie唱阿倫嘅歌（兩人合唱《幻影》及《霧之戀》），真係想都唔敢想，Leslie話唱就唱，之後重一齊錄音，錄嗰陣佢兩個完全冇嘢，當然如果佢哋個心有嘢我可能唔知。
絕頂好人容易𠱁
Leslie係一個絕頂好人，其實佢係一個細路哥，一個基本上聽話嘅細路哥，但要人𠱁。王菲就因為內地同香港嘅文化唔同，阿菲要好多嘢白紙黑字同佢分析利害所在，佢唔肯做嘅嘢，就算你嗌死佢都唔會理，相反Leslie係會改變初衷嘅，而且十次有九次勸佢都會中，佢對其他人唔係咁，所以個個話我唔知畀咗啲乜嘢佢食，我唔覺得係因為我把口叻，我同Leslie大家都咁鍾意音樂，而又想為音樂做啲嘢嘅話，咁會覺得我把口會叻啲。
張國榮喺做同黃耀明合作嗰隻碟（○二年《CROSSOVER》大碟）嗰陣開始有事，佢身邊啲人指摘我，話佢病，我唔應該喺呢個時候做唱片，我知佢情緒唔係咁好，所以同佢講話，宣傳要做，拍MV、錄歌、訪問一日做晒好唔好，佢呢頭話肯，但到拍MV嗰陣冇出現，佢打電話畀我話：「我真係唔舒服。」呢隻碟真係經典，明哥錄呢隻碟都瘦咗十幾磅，Leslie就錄晒歌但唔肯做宣傳。
《玻璃之情》成絕唱
我最後一次見Leslie喺半島酒店，當時佢最後一隻碟（○三年的《一切隨風》）已經度晒橋，全部用電影名做歌名，又唔需要有直接關係，碟名都定咗《亂世佳人》，但Leslie唔明，所以拗咗好耐，佢話自己狀態唔好，要畀多啲時間佢，最後都錄到十隻歌（最尾一隻歌《玻璃之情》），隻碟佢屋企人一直唔想佢出，最後出動咗法庭禁制令，仲謠言話啲歌係夾硬發死人財。
張國榮過身之前，我兩個幾月冇見過佢，隻碟錄咗成三個幾月，我記得佢打電話畀我，當時我喺法國，喺巴黎一條街歎緊咖啡，當時天氣好凍，但有陽光，佢話：「喂，小寶，我係Leslie」，我話「係咪真㗎，你唔好玩我啦，把聲咁嘅」，佢話「我真係好病，隻碟我錄晒，我錄得好辛苦，你唔好聽人哋嘅閒言閒語，你亦要相信我冇因為呢啲嘢影響我哋之間嘅感情，我哋係好朋友。」
第八話：張國榮（中）
口述：陳少寶
筆錄：張止寒
此欄逢星期六刊出
陳少寶（小寶）：曾是商台名DJ，先後擔任新藝寶、寶麗金唱片公司高層，一手捧紅王菲、Beyond，並曾和張國榮、許冠傑等巨星合作，九九年加入環球唱片任總裁，○三年離開，現為陳苑淇經理人。
