成班賓架食飯，竟然有權威人士在座。究其實，銀行業務與警察有密切關係，譬如洗黑錢，運輸（黃金、現鈔）保安，以至街頭騙存款等等，都涉及警察。權威人士話：「幾十年來都有街頭行騙之事，舊橋永遠有人受，師奶中招最多。不過今年呢類案件少咗噃，可能因為警方宣傳得多，銀行職員嘅警覺性好高，對一啲突如其來嘅萬幾兩萬銀或以上嘅提款，每每問得好詳細，啲賊人心虛，往往立即鬆人。」嗱，以後大家去銀行提取大額現鈔，畀teller問完又問，唔好發脾氣呀，銀行想保護你嘅財產啫。
本來以為好敏感，但左丁山忍唔住，點都要問：「警察中咗槍，點解仲能夠拔槍、開槍，打死疑犯呢？」權威人士講：「一半係運氣，一半係平時嚴格訓練收效所致。隧道內有樓梯，事發時，兩名巡警行上樓梯，疑犯行落樓梯，近距離內，疑犯居高臨下，連開兩槍，打中兩位巡警塊面，因由高向低射擊，一粒子彈穿過強仔嘅腮飛出嚟，唔係致命性；恒仔好唔好彩，粒子彈在面內可能撞到骨，產生好大撞擊力，導致面部大量出血，醫護人員搶救不及。恒仔中槍後，拔槍連開五槍，疑犯瞓低。所有警察都受過嚴格訓練，用槍之後，要立即將支槍放回槍袋之內，恒仔訓練有素，依足標準做，佢不幸過身，係警方損失。假如當時係巡警落樓梯，疑犯上樓梯，子彈方向會由面部衝上大腦，兩個巡警就可能當場死亡，而疑犯就可以奪槍成功咯。」
此乃不幸中之大幸，世事好離奇，惡有惡報，若然未報，時辰未到，冥冥中有注定。疑犯千算萬算，竟會掛一漏萬，冇諗到子彈由上向下發射嘅「走勢」，亦都諗唔到其他警察比佢更加勇猛，中槍之後仍然可以拔槍還擊。葉繼歡當年落網，亦因為畀警察非刻意地射中隻腳所致。作奸犯科之人，應以此為鑑，世上無完善犯罪嘅，始終會百密、千密一疏，天網恢恢，疏而不漏。