每逢選這類經典題目總份外熱鬧，朋友同事你一言我一語，但做落就知道痛苦，皆因代表人物太多。相信每一個人心目中的經典都不會一樣。90年代是運動員成為超級巨星的年代，例子有佐敦有巴治奧，但作為香港人，提起「珊潺」攞金牌，大家都最激動！
記者、部份攝影：黃藹瑩
一）風之后李麗珊
96年亞特蘭大奧運後，「珊潺」這個暱稱街知巷聞，重記得當年「珊潺」由美國返到香港再搭船回長洲的盛況，萬幾人迫出碼頭迎接這位「風之后」，佢重講吓經典對白：「香港運動員唔係垃圾！」感動港人。現在已結婚產女的「珊潺」始終是我們香港的第一金，我們香港的光榮，絕對是90年代的土產經典。
二）星仔變星爺
像小記八十年代出生的這輩人，說是飲周星馳奶水大的一點都不誇張！80年代穿梭機時代佢仲係星仔，到90年《賭聖》推出開始變星爺，90代可謂是由周星馳由頭帶到落尾，《唐伯虎點秋香》、《國產凌凌漆》、《大內密探零零發》、《食神》多少戲中對白至今仍是大家口頭禪！
三）古惑天王陳浩南
好多人都選陳浩南，仲要指明係鄭伊健當年扮的陳浩南（唔係選鄭伊健呀），唔知鄭生睇到呢個結果會有咩反應呢？唔係講笑，小記當年都幾迷鄭伊健飾的陳浩南，重居然同同學入場睇足三集《古惑仔》，𠵱家諗起都想笑。陳浩南造型唔係全身黑色就全身白色，都幾得人驚！不過可能對男生嚟講，佢女友細細粒的身材會重經典。
四）撞板籃板王櫻木花道
80年代有戴志偉，那90年代就應該有櫻木花道。唔知咁啱定咁蹺，漫畫《男兒當入樽》大賣的同時亦是米高佐敦帶領公牛隊稱霸的時期，那一期身邊的朋友都好忙，又追NBA，又追《入樽》。勵志故事講紅頭的櫻木花道（似足公牛的洛文！）由唔識打籃球，到變成球隊的重要人物，不停撞板又不斷贏波，既搞笑又勵志！
五）四大天王瓜分頒獎禮
90年代，四大天王永遠是所有頒獎禮的大贏家，想當年「十大勁歌金曲」獎劉德華、張學友、黎明同郭富城每人平均攞兩個，剩番的兩個其他歌手爭餐死，𠵱家重邊會有咁嘅場面？講到唱片銷量，佢哋當年大大話話一出碟都有雙白金的成績，𠵱家有五千都幾乎要慶功，真係蚊髀同牛髀。
六）末代總督彭定康
政治嘅嘢大家唔記得囉。末代港督彭定康最令人印象深刻的，始終還是在中環泰昌舊舖食蛋撻、在涼茶第一家飲涼茶的樣子，難怪有「肥彭」的暱稱。97年香港人史上最風光，但自從「肥彭」撤離香港回英國老家之後，香港亦開始了史上最恐怖的建華七年。唔係咁，我哋點會咁掛住肥彭！
七）凡人超模KateMoss
由CK底底廣告（同期的MarkyMark近年去咗邊？）、到英國雜誌《TheFace》雜誌封面（本雜誌都摺埋！），KateMoss至今仍是時裝界風雲人物。她以「凡人」的身高、平胸，徹底改變了80年代Supermodel「高頭大馬」的要求，不要勁身材只愛好衣架，不要美貌只要有味道，如是者Kate成了90年代的FashionIcon。愛蒲的她至今魅力歷久不衰，即使上年爆出「毒后」身份，廣告商紛紛解約，以為佢從此玩完？Sorry，Kate姐的地位好像比之前更穩固。吹咩！
八）籃球球王MichaelJordan
90年代是屬於籃球的。MJ絕對是一個籃球場上的神話，22歲已是公牛隊的靈魂人物，91年NBA總決賽首次奪得MVP，自91年起米高佐敦更曾帶領芝加哥公牛隊六次奪得NBA總決賽的冠軍；而一直與他合作無間的夥伴Nike直至98年，拜他所賜，每年營業額高達90億美元，（至今Jordan籃球鞋已出到第21代），你說他不是神話是甚麼？
九）頹廢王KurtCobain
91年大碟《Nevermind》爆出，高潮位是在MichaelJackson手中奪得大碟榜冠軍位置，令到Nirvana這隊樂隊升上神枱，94年主音KurtCobain懷疑因情緒問題，在最輝煌的時候自殺身亡，Nirvava亦於同年解散，從此就成為絕唱。十多年過去，KurtCobain已是經典人物，現場大碟《UnpluggedinNewYork》唔係Band友都聽得感動。
十）小馬尾巴治奧
1993年國際足協世界足球先生、1993年歐洲足球先生，都唔及其小馬尾令人印象深刻。當年身邊總有人紮條小馬尾，扮吓巴治奧，諗番其實有啲嘔。在94年美國世界盃的決賽，巴治奧就於一日間由英雄變成了罪人，決賽十二碼因腳患而踢失，世界盃冠軍拱手相讓給巴西。但故事未完結，1995年在祖雲達斯，他贏得自己的第一個意甲冠軍，之後轉會到AC米蘭，第二年就獲得第二個意甲冠軍。巴治奧一直戰至04年才退休。
後生心水
