做嗰行，都未必熟嗰行，但馬會主席夏佳理Ron，就明顯係做嗰行熟嗰行，睇馬都睇得準過人。自由黨林健鋒Jeffery噚日講起，上星期三同聖若瑟校友阿Ron食飯，席間大家講起某一場賽事，十二隻裏面有七隻都係熱門馬，熱門馬真係多到暈。照道理講，熱門馬都係多人買啲，事關跑出機會大好多㗎嘛。
點知偏偏阿Ron就唔信邪，只係信自己，自己度咗一條纜，搵一隻熱門馬搭住沙圈精選以外嘅冷馬，叫同枱嘅人一齊落注，點知個個人都唔騷佢，梗係費事輸錢啦，惟獨Jeffery就好捧場，跟佢嘅貼士去買，結果真係中咗三重彩，都唔知要讚阿Ron獨具慧眼，定係要讚Jeffery冇睇錯人至真。
雖然Jeffery唔肯講，究竟佢落咗幾多注？實在佢又贏咗幾多錢？只係猛咁話分得幾好咁啦，但佢都仲算有少少良心，應承用啲luckymoney請大家食餐飯，實行有錢齊齊分。
傳真︰2623-9278
電郵︰[email protected]