無驚無險，個市彈番128點，差不多收復前日失地1半。大隻公司派成績表，普遍唔錯。月底前挾吓淡友，恒指見萬六唔係冇機會，𠵱家只係相差229點。
中銀C輪9068：中銀（2388）中午派成績表，市場收貨，最高見15.90元，收15.80元，有0.10元進賬。熱門C輪之一嘅9068曾見91仙，低收83仙，跌1%。正股升而隻輪跌，原因包括正股派末期息48仙，增8.5仙。高息或加派股息，對窩輪冇着數係事實。但點解其他3隻熱門C輪9139、9812與2195，都分別升3.5仙至6仙（升幅7-13%）？
貨比3家不吃虧，9068冇升到，數據變咗最靚。其實，根據公式計算，9068昨日理論升幅應該係7.3仙而唔係跌1仙。睇好中銀，吼C輪，最着數就係9068。
地鐵C輪9196：地鐵（066）收17.95元，升0.35元。正股有勢，喺低位揀C輪買，9196條件唔錯。隻輪10月下旬到期，輪價35仙，負溢價0.2%，槓桿率5.1倍（有效4.7倍），引伸波幅21%。
章盛