春天時分，葉菜類比瓜果選擇多，近排最旺的要算菜心，檔檔有得賣，棵棵都又嫩又靚。不過望真點，其實仲有不少特別菜蔬可以選擇，好似呢隻顏色似旺菜和紹菜，外形又似菜心的旺菜心，都算係菜心以外的特別選擇。旺菜心來自潮州，選時留意菜葉帶光澤便夠新鮮。用來滾瘦肉湯，煲到完全軟身便最腍最甜。
