呢輪電影界中人行埋都喺度講緊話魔鬼警察徐步高呢單案，話好鬼精采，真係勁過拍戲啲橋段，馮仁昭早幾日都打過電話畀拍過《無間道》嘅劉偉強，問佢有冇興趣將呢單殺警案拍成電影，佢話：「唔會啦！單案係好精采，但呢單案涉及幾個家庭，𠵱家死者嘅家人咁傷感，我真係冇興趣拍呢個題材。」
「唔係合適時間」
杜琪峯都係一位好擅長拍警匪槍戰片嘅導演，但當馮仁昭問阿杜有冇諗過要開拍呢個題材，佢一樣冇興趣，因為死者家人仲要繼續生活落去，點都要顧吓生者感受。而王晶係最緊貼潮流嘅導演，但噚日佢話：「呢單案當然充滿戲劇性，一定會有電影公司諗過呢個題材，但𠵱家肯定唔會係一個合適時間，所以呢個階段，我都冇諗過拍，等人哋開埋死因裁判庭先再講啦！」
