3月23日
心情：無奈
近年香港唱片及電影業界，諗盡辦法捉非法下載嘅人士，啱啱《蘋果》港聞又報道一單捉人事件。話說今年一月，法院已頒令4大ISP合作，篤出涉案人資料，而昨日呢單女被告就最騎呢；上載153首MP3，居然話唔關佢事，只係佢個15歲女自把自為之舉，完全冇「授權畀佢侵人版權」。 嘩，咁都得，真係棟篤狀王都唔夠佢嚟！可惜法律界認為要確定誰人侵權，在執行上存有太大難度。
電腦男同旺角賣老翻嘅Johnny仔傾開，佢居然有另一番見解，話非法下載首當其衝係翻版事業！原來自WinMX同BT流行後，佢哋「瓣」數嘅生意一落千丈，甚麼樂壇最新大碟、荷李活片霸等，一出網上即刻有得Download，仲要坐喺屋企「印印腳」咁撈，唔使畀錢之餘，更免卻「去後巷攞碟」、「一個鐘後嚟攞貨」等麻煩嘢，最慘係好多新片仲快過戲院上畫！
電腦男家中過千正版碟，絕對百分百反翻版，更唔係想潑當局冷水，不過翻版呢家嘢係講教育，網上下載乃大勢所趨，點樣將劣勢扭轉成商機先係重點！你睇全球iPod網站驚人嘅賣歌數量，幾蚊一首歌大把人捨得畀。若一味大費周章捉香港人，問心講成效有幾大？國內、國外你又點禁先？就算真係咁好彩杜絕晒BT，亦幾乎肯定老翻市場將全面復蘇，版權人有排都未望到家鄉！