衞蘭師弟應昌佑小時候日日撞牆撼櫈，應媽媽擔心兒子智商有問題，及後才發現他只是大近視。約六歲起應昌佑就體形暴脹，才八歲體重已衝破150磅，參加游泳比賽，因為胖得游不動，結果成了包尾大王！
應昌佑的童年故事很逗趣，由於大近視，鬧出連篇笑話。應昌佑說：「我一出世就近視，阿媽以為我係白癡，兩、三歲嗰陣我見牆就撞，見櫈又撼，又講唔到乜嘢事，媽咪帶我睇醫生，睇咗至知原來我係近視，開始戴眼鏡，最初得百幾度，最深嗰時有成700度。」
自封龍門躉
變成四眼仔之後的應昌佑，突然胃口大增，身形不斷向橫發育。現時體重約160磅的他說：「我大約六歲開始肥，去到加拿大直頭狂食㖭啦！日日食漢堡包、薯條，又冇乜點做運動，返到香港之後繼續食，放學返屋企就自己煮嘢食，跟住就食晚飯，飲汽水，再食零食，乜嘢都擺晒落肚。最肥嗰年係95年，成210磅，仲戴眼鏡，又肥又核突。」
變成肥仔後，應昌佑的笑話簡直成籮，他笑說：「讀中學嗰陣，有次學校舉行游泳比賽，我揀咗游背泳，結果肥到游唔到，個頭望唔到後面，因為條頸肥得滯唔郁得！個個都上晒岸，得我一個喺度兜圈，梗係包尾啦！上體育堂踢波我一定守龍門，因為唔使跑，我又夠大份，企喺度都枒咗半個龍門啦！」
採訪：朱倬誼
部份相片提供：應昌佑
