早前搭的士於車廂內見到以下奇景，錶板附近位置擺咗4部手機；落車後回頭八卦望吓，見到司機停車等緊客之際，拎住其中一部手機起勢講，奇就奇在姿勢好似講緊無線電對講機（WalkieTalkie）；原來，有班的士哥哥利用手機的PTT（PushtoTalk）功能，將手機變成WalkieTalkie，㩒個掣就即時講話，仲可以最多玩到1對10，方便同班行家即時互相報料！
記者：招佩珊
攝影：陳智良
PTT（PushtoTalk）是指一種類似對講機「一按即講」的功能，利用現時手機的網絡作為傳送媒介，配合支援PTT功能的手機，只要有網絡覆蓋地方就可以通話，做到「一人說話，多人接聽」。
圍內通風報信
相對傳統的無線電對講機，PTT的好處是不受距離限制，只要網絡覆蓋地方就玩到，不過，通話時有2-3秒延遲情況出現，相信由於訊息須經由網絡傳送，所以出現延遲情況；的士司機大哥就方便開工搵生意，而一班朋友去行山、旅行就可以邊行邊講唔怕走失；若配合GPRS漫遊，去到外地都一樣傾得。另外，由於進行多人對話前要設定「群組通話」的名單，換言之只有「自己友」才可對話，手機屏幕亦有對方暱稱顯示，避免有外人加入，唔似得WalkieTalkie遇到茂四搭訕。不過，用家們要係同台兼申請該台的對講機服務。
PTT設定逐格睇
本地暫時只有新世界傳動網同3香港呢兩個網絡商提供對講機服務；在使用PTT前要花一輪工夫做設定，包括個人PTT位置、開啟群組、邀請或接納對方通話等，下面以新世界傳動網為例。
PTT手機精選
環顧市面眾多手機，內置PTT功能的以Nokia居多，大概有8-9部，睇吓有邊部啱你手形？
最平入門機Nokia6020
在多部PTT手機中價錢最平，千二蚊有找，功能唔算多，支援JAVA，亦叫做有個30萬像素鏡頭影吓相，平機有埋PTT功能，抵玩！
靚歌王Nokia6230i
除咗播MP3、AAC等音樂格式外，仲兼容iPod的M4A（MPEG4Audio）格式，更能體驗立體聲音樂播放，又有FM收音機，加埋130萬像素鏡頭，歌影功能兼備。
超大屏幕Nokia6270
手機影相功能愈來愈強，6270備用特大2.2吋屏幕，影相、拍片睇得清楚；加埋200萬像素鏡頭、5倍數碼變焦同內置閃光燈，媲美DC仔。
兩台收費
*另須配合「特易功能」或「極速上網服務」。
查詢：新世界傳動網（178178） 3香港（21211228）
外地一樣玩得
於外地漫遊時，只要網絡覆蓋照樣用到PTT，收費是對講機服務費，再加漫遊GPRS數據用量費用；兩台的國際漫遊GPRS收費，每KB大概$0.1-$0.27，以打出一個約10秒的群組通話之數據容量約為20KB為例，即大概$2-$5.4，比起漫遊通話費差距幅度無咁大，一班朋友於外地用PTT比打Roaming會比較化算。
鏡頭以外
今次呢個題目來由，乃幾位朋友、Call慣「8折的」同事加上自己，都見過的士有幾部手機的奇景而起，於是，搵的士司機影大相是理所當然；不過，搵的士難，搵埋個司機仲難，好在編輯咁啱識得班揸的士朋友，還有多謝拔刀相助的康哥。