百仕達（1168）10股送5股威華達（622），噚日雙雙造好，其中百仕達升7.84%至2.75元，而威華達則升4.48%至0.70元。
TCI因持有3.28%百仕達而獲送威華達1.64%股權，散戶似乎喜見TCI直接持有威華達，多於擔心TCI會沽出威華達獲利。
內地地產股累積升幅大，提供唔少獲利空間。Cookie話，最近見到有大戶開始減持，可能係驚咗內地的稅務政策調整會對地產股有負面影響。
基金減持 富力腳軟
好似富力地產（2777）就呈先升後挫之局，昨日最高升至39元，再創上市新高，但尾市一度被質至37.80元，收報38.45元，倒跌1.16%。資料顯示摩根大通與華平（WarburgPincus&Co.）兩個基金已開始減持，華平於3月17日減持443萬股，持股量由6.73%降至4.64%。由於持股量低於5%，日後再減持亦唔使公布。睇嚟內地地產股要睇車啦。
中石化（386）旗下石化三寶久唔久就會炒私有化，中石化冠德（934）公布業績後，再宣布換主席的高層人事調動，即刻引起市場揣測是私有化的前奏。噚日不但中石化冠德勁升13.48%至2.525元，同系的上海石化（338）及儀征（1033）亦分別升6.45%及7%。黑客話，業績公布後，大股東要增持、減持，甚至要提出私有化都比較方便，有炒家偷步入市炒賣唔出奇。不過兩股已炒得頗高，期望中石化會出更高價錢來私有化，實在有啲一廂情願。
濰柴動力（2338）正式與大股東重汽集團分家，重汽集團所持濰柴的23.53%股權將轉撥予山東國資委。由於兩者的惡劣關係所構成嘅負面因素（包括重汽集團唔再向濰柴訂購發動機）早已被市場消化，消息對濰柴亦無帶來太大震動。今次兩者脫離關係，相信可讓濰柴管理層更易重新上路。
阿虎