地鐵嘅車站上蓋發展項目全部集中喺將軍澳，最大係夢幻之城，其次就喺將軍澳站，唔知係咪睇好呢區，地鐵喺區內都揸番啲商場收租。
喺將軍澳站隔籬嘅君傲灣商場，由地鐵、新世界同慶隆集團共同持有，叫做君薈坊，𠵱家開始預租，蘭西問過地鐵，佢哋話個場總共兩層七十幾個舖，預計年底開業，幾錢呎租就唔肯透露。睇番地鐵網頁，話個場接近12.8萬呎。
另外，調景嶺站嘅都會駅商場，都有18萬呎，地鐵佔部份權益，但個場就交由長實負責招租。
君薈坊同都會駅商場邊個可以收得貴啲租，就知邊個搞租務叻啲。蘭西畀啲參考大家，地鐵舊年五月開業嘅坑口站連理街商場，可出租樓面得兩萬零呎，但係一年就收近3000萬租，平均呎租100蚊。
不過，君薈坊隔籬嘅將軍澳廣場，每呎租金最低五個四，兩個商場喺埋附近，唔知有冇對地鐵個場構成壓力？畀租客壓價呢？
地鐵親自搞君薈坊商場，都唔係冇原因嘅，因為將軍澳站上蓋舊年底至獲批，可以起一個超過21萬呎嘅商場，四幢住宅，兩座酒店及商廈。第日有天橋接駁君薈坊，咁可以發揮協同效應，值租好多。
另外，地鐵最大嘅一個商場喺九龍站，有近100萬呎，出年會推出招租，計吓計吓，原來地鐵都揸唔少商場，係半隻收租股。
電郵地址：[email protected]