華華早兩日講過，亞洲股神東尼本新書面世，噚日佢有個新書發布兼簽名會，都成200幾人捧場，除咗要搵佢簽名，更重要係想睇吓可唔可以問到啲投資竅門。
好似喺答問時間，第一條Q俾一位阿嬋搶咗，佢問東尼曾經建議買610（惠記集團）同1098（路勁基建），係咪真係買得過？此Q一出，全場忍唔住爆笑，睇嚟佢真係當咗東尼係金手指或者係陸叔。
另一個讀者就話，佢冇學一般人將資金50%買滙豐、50%買債券；而係一半買滙豐，另一半買其他股。東尼一向嘅論調係──長遠嚟講，買債券不如買滙豐。咁聽話，難怪畀東尼讚聰明。華華後來八到呢位仁兄原來係東尼大女Patsy朋友嘅爸爸。
冇錯，東尼嘅大女Patsy做咗家庭代表，嚟支持爸爸。不過喺英國讀完法律，家吓喺HK讀PCLL（法律專業證書課程）嘅Patsy，似乎對老竇嗰瓣冇興趣。佢話，每次老竇一講投資佢就去瞓覺，又話以前老竇試過畀筆錢佢同大妹投資，佢全部買晒滙豐，費事煩。妹妹就會有興趣研究點樣組合。
最搞笑嘅係，Patsy成日俾同學笑佢，話佢一定有好多手滙豐，因為東尼喺專欄講過，送咗啲滙豐股票畀仔女，Patsy笑說：「咪嗰一次咁多囉。」
李華華
讀者如有任何意見或報料，歡迎發送電郵至[email protected]。