做Marketing嘅都應該識得英國特許市務學會CIM，呢個會嘅會員嚟自各行各業，但入得去嘅都有番咁上下，即係大型機構市務工作的高層或管理專才。早兩個月該會創辦人之一馬幗英被選為CIM內國際市務學會嘅委員，即係可以進入學會嘅最高權力架構，係全球首位華人女性當選，認真巴閉。
其實早喺03年，馬幗英已經係首位女性獲得CIM會長大獎。香港分會主席為張永霖，而香港分會喺96年成立時，馬幗英就係籌辦成員之一，佢為個會都立下唔少汗馬功勞。而佢喺工作上最為人津津樂道嘅係，喺當年在先施，搞「瘋狂大減價」，真係搞到唔少市民瘋狂，呢個「活動」重成為定期「活動」㖭。
順帶一提，今個禮拜六，CIM會搞個座談會，地點喺城大，搵咗多間大公司嘅Marketing猛人，分享佢哋嘅市場技巧及經驗。個座談會分上下晝舉行，朝早請咗滙豐、喜來登及九鐵嘅人，講吓佢哋點樣善用策略，化「挑戰」成「機遇」；而下晝就搵嚟中電、可口可樂同埋JVC嘅講者，分享如何拓展業務嘅多元性，同增加企業嘅競爭優勢。