大市跌唔落，又上番10日同20日線之上，個市暫時唔可以睇得太好（16000關有阻力），但亦唔可以睇得太淡，基本上係橫行整固之局，繼續個別發展。
恒指高收15771，升128點，上升股（唔計認股證）有470多隻，頭40大嘅升幅都超過10%，過千萬元大成交的亦有12隻，資金追逐消息股同落後股。
中石化（386）旗下3隻準私有化股份，真係送錢畀你使。噚日午後傳出話下禮拜就會有日程表，3股即時彈起，上海石化（338）收4.95元，升6.4%；儀征化纖（1033）收2.275元，升7%；剛宣布業績的中石化冠德（934）更收2.525元，大升13.4%。消息話上石化會行先一步，作價5.60元至6.60元。
百仕達（1168）在宣布去年全年業績前1個月，突然派發特別股息，10送5股威華達（622），股價有反應，收2.75元，升7.8%。百仕達目的好明顯，就係：?確立公司純內地地產商的形象；?負債比率由原來的150%下降至47%，在融資方面，能力增強，成本下降。
業績料有驚喜
百仕達此舉有深層意義，相信公司現正醞釀大動作，在下月宣布業績時會令投資者有「驚喜」。現時百仕達已成為基金股，芬佬估計佢「正名」後，股價有機會升上4元至5元水平。
早輪百仕達批股，基金上晒手，現時VP持有5.96%，TCI持有6.05%；另外，毋須公布的還有GLGPartners同PMACapitalManagement，約共持有8.5%，加埋大股東歐亞平揸住48.81%，合共已有70%。百仕達「正名」後，預期會有更多基金上車，而大股東又唔排除會增持，貨源會逐步收亁。
去年12月TCI入股時，百仕達股價曾衝上3元，其後反覆回落，在2.20元至2.50元間形成長方形徘徊區，基金收集完成後，近日再破位而上，短線上升目標係3.25元，中線可向4元推進。
威華達派送後，亦搖身一變成身基金股，小投資者持股亦只佔30%，消化沽壓後相信會有大作為。
郭兆誠