代理帶客睇樓，好多時都以的士代步，如果一日睇幾轉樓，淨係的士錢都好襟計，所以唔少代理行都會買部公司車，請埋個司機載客睇樓，但條數都好勁㗎，大行就話可以負擔，細行可以點做呢？
不如效法世紀21中華物業董事楊官華諗出嚟嘅好橋，佢喺半個月前以三百五十萬買咗部的士，然後出租畀的士司機，需要時就電召架車載客睇樓，無客睇樓就做街客生意。
架的士既有租收，又唔使額外畀錢請司機，同時享有公司車之便，諗落真係好抵。
重有，楊官華話架車係自己公司嘅，當然可以物盡其用，用埋的士車身去賣廣告，將公司資料同電話貼晒出嚟，變成流動廣告牌，慳番唔少廣告費。
佢話，自從的士廣告出街後，果然接到唔少外區查詢電話，於是佢又心思思買多兩部的士，不過最快要三個月後先出到牌，三部車總投資額高達1000萬，不過出租的士嘅回報率接近五厘，相當唔錯，最重要係一項投資，有幾樣回報。