又到星期五，孫柏文想用今日嘅機會來個一周總結。首先，幫我隻金手指邀一邀功，喺兩個半星期前我叫大家買實貨白銀，到今日已經升咗5%。雖然，例牌買隻中國人壽，一個朝頭早都分分鐘可以有5%升幅，買輪仲唔止㖭！不過有錢賺都總好過冇錢賺。
白銀雖然已經升咗5%，去到10.5美元一盎斯，不過還離開我隻金手指篤出來嘅120美元目標價少少。當時，我都講過白銀要到達120美元目標價，可能需時十年，𠵱家仲淨九年零十一個月鬆啲，所以，大家唔好放住，靜心等待。本周白銀上升的主要因素，係花旗國證監講話巴克萊銀行已經想搞好耐嘅白銀投資基金「冇問題」。「一批即升」這個現象，國際金融版冠一兄都講過，果然厲害，貼中！不過點解會有「一批即升」呢個現象呢？等隻金手指解釋畀大家聽。
白銀基金嘅運作模式好簡單，投資者經股票行向巴克萊銀行買一個有股票編號嘅基金單位，巴克萊銀行就會即刻喺公開市場，買一盎斯白銀放響倉裏面。投資者愈買得多基金單位，倉裏面就會愈多實貨白銀。到這一點，金手指啲醒目讀者都會問：「點解投資者唔直接買？隔咁多重咁麻煩。」
白銀工業用家反對
呢個問題問得非常好。其實，喺花旗國有閒錢做投資嘅人，唔似我哋特區投資者有咁多金融機構提供投資渠道。喺啲大埠都仲有各式各類的投資服務，不過去到花旗國中部，除咗啲只提供簡單服務嘅銀行之外，就乜嘢金融機構都冇，頂多有幾間細經紀行。所以將白銀變成股票咁買賣，就會多好多以前冇機會買白銀嘅投資者參與。
孫柏文相信你哋會再追問：「咁點解個基金咁耐都未批呢？」原因係有一班用好多白銀嘅公司嘈，話如果白銀基金受到投資者歡迎，市場上嘅白銀咪擺晒喺基金個倉度？咁樣夾倉，白銀價錢會飛升，令到嗰啲真正用白銀嘅公司面對成本上升壓力。每年市場都會用掉大約8億盎斯白銀，重銀礦生產出來的只有6億盎斯。如果，一個好像李嘉誠嘅人用成副身家去買，就可以買起10億盎斯白銀。到時全街冇貨，用白銀嘅工業就要去搶，白銀仲會唔會120美元一盎斯？所以我只可以問大家一句：「你今日買咗未？」
孫柏文