熱愛音樂的張德豪，打算於今年推出個人大碟，而且計劃在內地和香港兩個市場同時發行。雖然他的主打歌曲並不是流行曲，反而是黑色小調，但他相信樂迷會支持，他更雄心萬丈於廣州自設錄音室，方便製作歌曲。
張德豪現正籌備個人唱片，打算於暑假期間推出，而首隻派台歌《走遍世界》快將推出。在這個人人都叫苦的音樂市場，張德豪與音樂人溫應鴻卻自資出碟，更在廣州投資百萬建錄音室，打算一次過打入香港和內地市場，不過他表示充滿信心，憑其獨特黑色小調，歌迷會受落。
自比明哥
豐富製作歌曲經驗的張德豪說：「其實我同師傅溫應鴻，同埋我哋嘅音樂班底，已經做過好多歌，曾經同張國榮、梅艷芳、陳奕迅等製作，所以好有信心。雖然今次主打歌曲係黑色小調，並唔係流行曲，相信歌迷會喺第三首派台歌先慢慢接受得到，好似黃耀明都唔係唱K歌，佢個人風格都好多人鍾意啦！」
為了有利製作歌曲，張德豪除了在香港設個人錄音室外，最近更在廣州投資百萬，開設設備完善的錄音室，他說：「我哋同國內好多唱片公司都聯繫咗，好多好紅嘅歌手都喺我哋錄音室錄歌㗎！四千呎嘅地方，我哋錄歌都方便啲，打入國內市場都有利嘅。」
覓經理人
另外，與M8經理人公司已經約滿的張德豪，現在與其他公司洽談合作，他說：「始終我宣傳唱片要內地、香港兩邊走會好忙，加上電視劇、電影都要有人幫我打理。」
採訪：王連連
