渝太地產收租收咗十幾年嘅淺水灣豪宅寶晶苑，大約兩年前開始拆散賣，不過銷路麻麻，相對同期同區拆售嘅淺水灣道56號，去貨量同知名度都差好遠。不過，寶晶苑啱啱賣出9號屋，聽聞買家係有「鐘錶界女強人」之稱嘅靚女胡敏珊，呢間曾作示範單位嘅大屋，盛惠4900萬。多咗個名人業主，相信或多或少起到宣傳作用啩。
胡敏珊買入嘅示範屋，面積近3700呎，連300萬豪裝，呎價超過13000蚊。一擲半億買豪宅嘅胡敏珊，雖然唔係明星，只不過喺15歲時拍過維他奶廣告，之後一度係波場常客，非常多新聞。佢公司代理嘅美國錶，由佢自己做生招牌。
寶晶苑全數15幢洋房，𠵱家仲有11間，今次名人入市，希望幫到散貨啦。