超人密友周凱旋今日一定好紅，但將來嘅事，邊個知呢？佢檔生意TOM仔，換咗新CEO後，真係好似啲桑拿廣告話齋，「新人事新作風」。
TOM姐湯美娟上場後，講明會減持冇咩肉食嘅資產，實情係盤點大清貨，清理上手兟哥啲手尾，呢頭賣番《亞洲週刊》畀《明報》，換番少少股份，噚日又傳出會將戶外媒體業務旗艦OMG三成股權賣畀獅城新加坡報業控股（SPH），應該可以骨番5至10億，估唔到，湯姐可以快手成咁！
咁點解賣畀SPH？當然，單刁華華冇份傾，只能斷估無痛苦咁解釋吓，SPH係獅城官府有份嘅，而獅城官府最大嗰件仍然係內閣資政李光耀，咁李光耀同阿超人又係Friend底……所以，咁樣估係咪好合情理呢？