日前喪父的譚詠麟雖已平復心情，不過阿倫的正室楊潔薇（莎莉）和紅顏知己朱詠婷（Wendy）近日卻成為追訪對象，從來不正面回應感情事的阿倫，昨日終於首度公開承認莎莉、Wendy及兒子譚曉峰的身份，並感慨地表示對兩位「背後的女人」感到歉意。
譚詠麟昨日應邀到香港電台接受訪問，除了談及喪父的悲痛心情外，阿倫更首度公開承認「包二奶」及正室楊潔薇（莎莉）的身份，並暢談與紅顏知己朱詠婷（Wendy）相識經過及兒子譚曉峰，當談及與亡父及兒子的生活點滴時，阿倫顯得眉飛色舞，但談到因一己私慾而與Wendy相戀及產子的經過時，則感到萬分悔疚，更透過電台公開向兩位「太太」表達其愛意。
查實早前有周刊指阿倫還有一名三奶許佩瓊（Mandy），對方曾任職桑拿浴室知客，報道還指阿倫在黃埔買了一個單位給她，實行金屋藏嬌。
以下為阿倫受訪內容，譚詠麟：倫 車淑梅：車 DJ蔡浩樑：蔡
同玩假牙
指譚伯每見孫兒必冧
車：爸爸過身嘅時候，全部親人都喺身邊？
倫：全部都喺身邊，連個孫都喺度。佢講唔到嘢，但係我哋不斷喺佢耳邊講嘢，叫佢安心走，同佢講我哋會記住佢嘅教誨，其實我每次同佢講親嘢佢都係最大反應。
車：當爸爸聽到個孫嘅聲音時，會唔會有好大嘅反應？
倫：會呀！開頭佢（譚曉峰）仲會叫快啲好番。
車：𠵱家小朋友會唔會唔開心？
倫：始終都係細路仔，佢會覺得大人好奇怪，點解個個跪晒喺度，我覺得喺某啲場合，始終要畀佢知中國人有啲咁嘅禮法。
車：其實你爸爸生前對個孫係點？
倫：每一次見到佢都好開心，都會冧晒，試過一次同佢玩嚇咗個孫一跳，阿爸攞咗棚假牙出嚟，不過佢震咗一震啫，冇事。其實喺安老院時都有帶個仔去探，嗰時佢（譚父）都唔係好認得人㗎啦！十次入面其實認得一、兩次，我就一定認得過半數，最緊要係阿媽。
車：Shirley（阿倫正室莎莉）嘅心情好嗎？
倫：佢OK，佢幫手做咗好多嘢，𠵱家做緊悼念冊，搵咗好多相出嚟，最緊要係搵番1936年希特拉送畀佢隻錶出嚟（譚父當年到德國踢奧運足球賽時獲贈），佢成日講住，近呢十年都冇見過佢攞出嚟，最近終於喺個櫃底入面搵到。
車：扶靈名單出咗未？
倫：𠵱家決定咗，有溫拿、曾志偉、阿叻陳百祥、李克勤同可以代表體育界嘅張國強。
首度承認
「我係有個仔叫譚曉峰」
蔡：記者朋友嘅追訪會唔會造成壓力？
倫：（搶着回答）佢哋最主要係一樣嘢，最想知家庭嘅嘢，但係我講畀大家聽，呢個唔係一場騷、一場戲，係家庭嘢，係，我係有個仔叫譚曉峰，我係有個老婆叫楊潔薇，都有個知己叫朱詠婷，其實對佢哋兩個都好辛苦，每個男人背後都有女人喺度，咁我諗除咗我阿媽嘅母愛最偉大之外，佢哋兩個女人都好辛苦，有成十年，個仔都咁大個啦！都過咗十歲。呢十年我得到無比嘅愛、關懷同愛心，對我亦都係有體量、包容同埋受咗好多好多委屈，甚至乎我自己都好辛苦，呢樣嘢其實都於理不合，唔學得，亦都唔係個個能夠學到，可能我自己有自己諗法，可能係為老竇留個後代，或者一己私慾，諗歪咗，想有啲嘢係屬於自己嘅，咁就演變咗今日咁。
倫：身為公眾人物，我自己係好辛苦，同埋喺身邊嘅人都好辛苦，對佢哋深感歉意。有時會無端端諗好多奇形怪狀嘅嘢去岔開話題，諗番轉頭都覺得自己好荒謬，好辛苦，自己都唔係好鍾意咁樣，但係都冇辦法。咁多年嚟多謝傳媒有畀我哋好多走盞位去面對兩個家庭。
倫：講到錫我，身邊兩個女人真係好錫我，問題一定有，點解無端端會有一件咁嘅事發生，兩個人相處有時可能疏忽咗，或者你需要嘅時候佢未必畀到，喺嗰陣時就遇到Wendy。
車：佢係唔係你嘅歌迷？
倫：唔係，佢一向以來最鍾意嘅係張國榮，鍾意Leslie嘅歌，仲好反對我嗰派。有一段時間佢畀到好大support我，畀到我需要嘅嘢我，人同人之間好微妙，喺初初識佢只係通電話，後來至發展有嗰種感覺，有時感覺一嚟就嚟，我覺得唔係太成熟，我覺得佢好善良，善解人意，幫到我手做到嘢，知道我有時需要啲乜嘢。
請求諒解
正室至今難容第三者
車：決定要BB係意外定係刻意呢？
倫：係意外，經過商量之後都要。
車：當時家人嘅反應係點？
倫：知道嗰時家嘈屋閉，人哋講鬧交，有來有往，但係我就日日俾人鬧，咁的而且確係錯，鬧咗幾年，大家鬧到冇癮，Shirley日日都係咁鬧，但係都要面對，我同佢由冇去捱到有，事無大小，演唱會嗰啲嘢都係由佢構思呀，諗出嚟，咁我同佢講畀時間大家，兩個都咁好，你哋諗下囉，其實呢啲都係歷史嘅嘢，但係都要解決囉。
車：Wendy到𠵱家都係你嘅知己？
倫：佢係我嘅紅顏知己。
車：Wendy有冇進一步嘅要求？
倫：冇！我覺得對佢哋都唔好意思，對兩個同個細路仔都唔好意思。
車：其實Shirley接受Wendy未？
倫：大家知道有件事發生，希望大家用啲時間諒解多啲，大家雙方面，我人就得一個喺度，真係唔知點算。
車：怕唔怕仔仔喺（譚伯）喪禮現身？
倫：我諗緊方法，佢未識保護自己，父親有保護佢嘅職責，Wendy亦都好擔心，佢對佢好細心，好照顧。
車：個仔有冇你同你爸爸嘅遺傳？
倫：（笑說）大食囉！佢好好動，有音樂感，踢波都好叻。
趁機示愛
「我對佢哋好尊敬愛錫」
車：你已經講咗來龍去脈，係咪會感到釋放？
倫：係，因為我有兩個咁愛錫我嘅、喺我背後嘅女人，𠵱家我都對佢哋好尊敬、愛錫，的而且確係我最需要有人傾講，我再講一次多謝佢哋啦！無論佢哋覺得我值唔值得原諒，無論佢哋覺得點樣，我暫時做到嘅只係得咁多。我希望可以調校返一個正常啲嘅關係啦！其實我好開心可以撞到一個咁嘅知己，有啲嘢成日都想有，但係未必一定得到，Wendy的而且確係畀到一啲咁嘅感覺我，好多謝佢。
撰文：林妃
