將成本牛津字典記晒入腦？唔用卡片簿一樣記得所有聯絡人資料？咪以為擁有超強記憶力就係超人，國際級記憶大師葉瑞財博士並無超能力，只靠一套「記憶武功」行走江湖，佢就好似武俠小說裏面嘅張三豐，跟佢學藝嘅徒子徒孫大把，練得成呢套武功，你都可以成為過目不忘嘅黃蓉。
記者：羅灝汶
攝影：楊錦文
圖像記憶法
博士入室弟子Humble老師：「相信大家都有類似經驗，搵極都搵唔到卡片簿裏面嘅人名或電話，其實將腦袋變成一個無限大卡片庫，先係最方便處理卡片嘅方式。」咁點背52隻啤牌？佢解畫：「博士唔係天生記憶力異於常人，而係懂得用30種記憶法，其中一種就係人人都學得懂嘅『圖像記憶法』。」原來人天生唔鍾意記數字，所以要將資料幻想成圖像，以背啤牌為例，一副牌52隻，紅心A可以幻想成「1支玫瑰花」、葵扇6=「6把風扇」、葵扇K=「歌王張學友」、紅心K=「情心款款黎明」、梅花K=「浪漫劉德華」、階磚K=「郭富城階磚上跳舞」等等如此類推，再幻想人體由頭到腳分成52個部份，嚟代表52隻牌嘅擺放位置，例如頭頂代表第1隻牌、額頭代表第2隻牌、腳趾尾代表第52隻牌等等又如此類推。記嗰陣，記圖像佔據身位邊一部份，例如第1隻牌係葵扇K，就應該靠「歌王喺頭頂上唱歌」，第52隻牌係紅心A嘅話，就應該靠「腳趾尾踩住支玫瑰花」咁記嘞。
開班教卓憶學
記憶學已經有幾百年歷史，人類不斷追求大腦發展，個個都想練成超強記憶，葉博士教授的「卓憶學」就好似武俠世界裏面嘅《易筋經》，打開個人記憶潛能，幫你打通任督二脈：「人人都可以學識超級記憶技巧，不過大家千祈唔好誤會，擁有超強記憶賭錢就可以百戰百勝，將所有麻雀啤牌記晒入腦就可以贏大錢嘅只不過係電影橋段，但記憶技巧絕對可以幫助到大家嘅日常生活，保持頭腦清醒。」我份人最鍾意挑戰權威，難得阿博士又肯接受挑戰，梗要搵啲測試難一難佢，結果真係難佢唔到。
6歲小朋友都學得識
小學一年級的盈盈今年6歲，上年開始跟隨Humble老師學習記憶技巧，上過20個小時記憶課堂，已可輕易於3分鐘內背誦40個數字，順序倒序一樣難佢唔倒，盈盈媽媽最開心：「學咗記憶技巧後，盈盈學習語文有明顯進步，我唔使花時間同佢溫習，嚟緊我會參加成人班，好玩得嚟又可以同囡囡一齊學習。」
另一學生Sanny又咁話：「我只係上過兩次課程，對我工作好有幫助。我從事香薰行業，成日要背好多香薰名同生字，仲要參加資格考試，𠵱家我已經可以輕鬆背誦100個數字，順序、倒序都掂，客人對我都更加有信心。」
測試1：背啤牌
測試2：背字典
測試3：背年曆
測試4：邊聽邊記
街訪
博士威水史
英國人創辦「世界記憶協會」，在1991年舉辦了第一屆「世界記憶錦標賽」，分「快速成憶數字」、「聽背數字」、「背詩歌」、「一小時記憶啤牌」、「記憶樣子名稱」、「記憶日子」、「一小時記憶數字」、「2進制數字」、「記憶隨機文字」及「快速記憶啤牌」等10個項目。1997年，英國舉辦第一屆「世界奧林匹克思維運動會」，葉瑞財博士則於2002年英國倫敦第十一屆「世界記憶錦標賽」中贏取「十項全能記憶大師」，另於2001及2002年參加「奧林匹克思維運動會」成為全場總冠軍，記憶力絕對當世最強。
1.成功記憶1,774頁的《牛津高階英漢雙解詞典》，為馬來西亞國家紀錄大全創新紀錄，被國家譽為《活字典》。
2.成功記憶從1600年至9999年的日曆。
3.成功記憶6萬個圓周率號碼，打破「TheInternationalWorldRecordBreaker'sClub」紀錄。
世界記憶錦標賽網址：
http://www.worldmemorychampionship.com/
成人「卓憶學」演示會：4月4日、12日、18日及25日
兒童「創憶學」演示會：4月7日、14日及28日
時間：7:30pm-9:30pm（7:00pm登記入場）
地點：佐敦吳松街191號突破中心
內容：介紹記憶法技巧
查詢電話：82022101
網上登記： http://www.geocities.com/dr.yip_memorytalk/D.htm