泛珠三角區域金融服務論壇噚日喺亞洲博覽館舉行，係亞洲博覽館今年初開幕以嚟最勁一宗盛事，除咗本港財經金融界猛人盡出，仲有行政長官曾蔭權主禮，財經事務及庫務局局長馬時亨、金管局總裁任志剛及港交所主席李業廣都有到，國內財政部、國有資產監管委、人行、中國證監、保險監委、中國銀行業監委、社保基金理事會、外管局也有派出財金官員出席，再加上國內九省及澳門官員及企業，一共有460人參與呢次論壇。
為了凸顯本港國際金融中心的地位，主辦當局竟然大膽安排咗一場純用英文嘅演講，雖然講者中包括了中國海洋石油董事長傅成玉，聽眾又以內地同胞為主。反觀任志剛局長，就自嘲話自己用港式普通話致詞，不過水準一點都唔差，連「越俎代庖」咁難講嘅普通話都識。
