地政總署上個禮拜公布新一年度嘅勾地表，新加入十七幅地皮，但係呢批地皮，最快都要下個月至可以勾得，就算勾出都要六月先拍賣。𠵱家勾地表嘅地，已經六個月冇發展商吼，政府擺啲新地皮入去，應該係想搞起個市，等發展商去勾地啫，點解要搞到咁遲至賣得？
地政總署署長劉勵超爆出原因，就係有啲地皮以短期租約租咗出去，因為租期未完，所以唔可以拎得出嚟賣住。
佢又呻咗句，原來有啲公司租咗塊政府地嚟用，之後就撒賴，唔交租，搞到政府要同佢哋打官司，先可以收番幅地。
住宅樓有租霸，搞到業主雞毛鴨血，勢估唔到政府地都一樣有租霸，呢啲租霸認真膽生毛，竟然喺「老虎頭上釘蝨乸」。
講番啲地皮，自由黨主席田少話，聽市場人士講，新加嘅十七幅地，有十一幅價值少過十億，啱啲中小型發展商胃口。佢又補充，劉勵超話有發展商出估值三至四成嘅價錢去勾地，但據佢了解，有啲發展商勾山頂地，呎價畀到萬六蚊都勾唔出。呢兩個版本，實情應該係大家都只講出事實嘅一部份。