市傳舖王鄧成波以二千零六十萬，向李姓投資者買咗旺角星際城市地下十三號B舖，呎價接近三十萬，打破○四年西洋菜街十四至二十四號、榮華大樓地下A1號由津味菓汁租用個舖嘅紀錄，榮升新舖王。津味個舖呎價二十五萬二千蚊，係九七後新高紀錄。
呢次舖王龍爭虎鬥原來係羅生門，事關有代理話個舖建築面積七十呎，呎價二十九萬四千幾蚊，係新高；但亦有代理話其實有九十呎，呎價只係二十二萬八千幾，撼唔贏津味嗰個。如果再睇李姓投資者買賣紀錄，仲話個舖有成百呎。其實舖位嘅建築面積有時幾難定，買家最好同業主一齊搵測量師現場度過，否則買貴咗都唔知。
蘭西可以補充少少嘅係，現時該舖由鷄蛋仔同找換店每月以九萬五蚊租用，波叔有五厘半回報。
電郵地址：[email protected]