噚日港股下午2點忽然急跌，市場人士話係因為期指作怪。不過，有人提醒，鄭少秋又有新劇出街，秋官效應又出現。呢次秋官套戲係時裝劇，叫做「潮爆大狀」，下個月3號正式喺翡翠台播，秋官首次演大狀。
華華發現，今個星期六開始，無綫仲會喺佢嘅TVB星河頻道重播「大時代」，呢次不但係秋官咁簡單，直頭係「丁蟹重臨」，唔知效應會唔會更驚人，因為星河頻道利用衞星轉播，覆蓋東南亞，連內地都有限度落地；反而香港收唔到；但有「潮爆大狀」喺香港播，即係如果今次秋官效應靈驗，成個亞洲都可能出事。
近年秋官效應並非百發百中，股民又未必需要咁恐慌！不過有口痕友話，去年10月「潮爆大狀」試造型，兩日後適逢「八七股災」18周年，港股勁跌224點，都有人話係秋官效應。
咁究竟秋官效應的靈驗程度去到邊呢？華華整咗嗰表畀大家參考，自92年大時代開始，十二套裏面有九套跌得三套升。而時裝同埋古裝各佔六套，時裝五套跌一套升；古裝就有四套跌兩套升。
李華華
讀者如有任何意見或報料，歡迎發送電郵至[email protected]。
