三月十八日本欄引述一位讀者司徒先生解釋何謂柴魚，三月二十日收到另一位讀者楊先生電郵，佢話：「湖北地方有菜肴名水煮柴魚，鮮美可口，民間稱黑魚或柴魚，正名為烏魚，其性兇悍，追吃池中小魚。」楊生話柴魚即生魚，含蛋白質高。
生魚煲西洋菜，左丁山飲過唔少，點都未諗過生魚即柴魚，多謝楊生提供資料。另外三月十九日本欄講追思逯耀東教授，一位女讀者來函話佢係新亞書院八九年畢業生，睇過幾本逯教授著作，或已絕版，值得介紹，就係（一）《那漢子》，一九八六年武俠小說；（二）《勒馬長城》，一九七七年出版之歷史研究文集；（三）《那年初一》，一九八七年散文集；（四）《劍梅筆談》，一九八三年之研究現代中國史文章。呢位女讀者話：「逯耀東教授除了史識之外，文筆亦非常好，他的文章可以作為中史科的通識教材，怕只怕今時今日的老師忙於保住飯碗，又或者太過刻意追求中國共產黨標準的政治正確，不敢採用。」講得甚好。多提一句，逯耀東教授追思會在三月二十六日下午二時半於新亞書院人文館舉行。
中國共產黨標準的政治正確，唔易跟隨。呢日在灣仔碰到一位自北京開會回來嘅人士，佢話曾特首外表強政勵治，到北京就碼實大官。不過大官退休，早已提上議程，報紙曾有報道，被立即否認，皆因時機未至，而有人一時口疏，放料出外之故。香港記者好明白呢一招，譬如傳出Ａ銀行買Ｂ銀行，Ａ係上市公司，Ｂ唔係，Ａ一定要澄清傳聞，於是對記者講：「現在我哋冇收購Ｂ銀行嘅計劃！」現在梗係冇啦，一個星期後咪有囉。所以現在有人否認大官今年退休，而明年一月二日大官告老還鄉，都算佢冇講大話。
呢位人士又話中央要求穩定特區管治，一個不能走，既然想走嘅唔准走，大家開會時最好和和氣氣，大事勿提，難事勿做，一切等到二○○七年七月一日後再講。呢個時候九鐵竟然起風波，犯正大忌，有乜辦法唔人頭落地，益咗田二少。