利嘉兒是孻女，萬千寵愛在一身，難怪恃寵生驕，變成家中小霸王，而遭殃的往往是比她年長四歲的姊姊。五歲前利嘉兒經常發脾氣咬姊姊，咬得她滿臂傷痕，她又試過向媽媽撒嬌扭買玩具，奸計未遂，竟然當街罵媽媽「八婆」，結果被媽媽還以一招「間尺炆豬肉」。
利嘉兒出生於小康之家，除父母之外，還有一個姊姊。由於利嘉兒酷似混血兒，加上是孻女，故甚得家人痛錫，還因此有恃無恐，變成家中小霸王。她笑說：「細個嗰陣我成日蝦家姐，一發嬲就係咁咬佢，有時咬到佢手臂損晒，但家姐都毫無怨言，又從來唔會向爹哋媽咪告狀。」直至五歲那年，利嘉兒開始懂事，就沒有再咬姊姊了。
返家施體罰
雖然這個小霸王橫行無忌，不過還是被媽媽收服了，利嘉兒笑說：「我唔知喺邊度學咗『八婆』兩個字，又知道呢兩個字係話女人嘅。有次同媽咪行街，我扭計要買煮飯仔玩具，佢點都唔肯買，我竟然衝口而出鬧佢『媽咪係八婆』，媽咪好嬲，平時佢唔捨得打我，結果嗰日一返到屋企即刻拎間尺打我手板，我就喊到死死吓。」
升中學時，利嘉兒獲編派入讀一間男女校，當時媽媽曾命令她不准拍拖，可是中二那年利嘉兒還是偷偷與一名讀中三、品學兼優的師兄編織豆芽夢，她回憶說：「我有時會呃媽咪要留喺學校做project，然後同師兄去快餐店食下午茶。我哋最多只係拖吓手，不過我內心已經好有罪惡感。」後來因為師兄移居外地，這段puppylove亦無疾而終了。
採訪：比華利
部份相片提供：利嘉兒
