新世界發展董事總經理鄭家純同剛果皇后溫瑞芬嘅瓜葛，又有新發展。噚日《新京報》報道，皇后已遭正式逮捕！原因係涉嫌巨額詐騙，報道仲引述新世界方面話，新世界已經向公安機關提交咗證據，「完全足夠證明對溫瑞芬的指控」。
呢單案，來龍去脈據聞好簡單，某人話自己同微軟簽咗大中華地區嘅商業軟件框架合作協議，於是搵人落叠投資，結果搵到好鍾意幫朋友，又鍾意四處投資嘅純官。由於舊年喺北京新世界軟件發布上，某人搵到微軟大中華區總裁陳永正做嘉賓，令可信程度大增，純官就更加不虞有詐。
到咗舊年年底佢兩個就結怨嘞，話說當時溫瑞芬入稟法院告純官，話純官冇履行合約，將一間公司嘅四成股份轉到佢名下，呢單官司未打，市場已經傳出溫瑞芬年初一喺北京俾公安請去問話嘅消息。
成件事最慘係北京新世界軟件班員工，據內地報章報道，溫被捕後，新世界軟件賬目被凍結，班員工已經接近兩個月冇糧出。純官今趟算唔算我不殺伯仁，伯仁為我而死呢？