噚日白銀又創二十二年新高，今日孫柏文原本想幫我隻金手指邀功。不過噚日答應過讀者，話今日會解釋普京神州遊對俄羅斯國策的啟示，所以我會畀白銀再升多啲先至去邀功。哈！哈！
話說噚日，金手指篤爆俄羅斯政府呢一期煩緊國家存亡啲嘢。咁俄羅斯賣石油畀祖國，對俄羅斯加強對鄰國的影響力，去防止國家瓦解，又有乜用呢？同埋俄羅斯係唔係真係面對國家滅亡咁大挑戰？
普京剛剛上任時，已經清楚明白俄羅斯唔係世界超級強國，經濟亦弱到不得了。仲諗住將俄羅斯傳統對西歐同美國嘅仇恨擺埋一邊，定位親西方，然後透過貿易同其他商業活動令國家富強。國家富起來之後，先再講做世界超級強國。
點知2004年響烏克蘭，俄羅斯被人踩到上心口。烏克蘭由沙皇時代起一向都被俄羅斯支配，點知一場「有外國勢力介入」嘅橙色革命，烏克蘭變成敵對國，分分鐘參加北約組織。由烏克蘭到莫斯科，都只不過係四百公里，即係話如果北約坦克車指揮官係謝霆鋒，唔使兩個鐘，莫斯科就可以淪陷。又如果，俄羅斯邊防軍，採納九鐵管理層眼中「理想」嘅事故通報機制，咁分分鐘普京要去到有敵軍坦克車泊咗喺總統辦公室外，先知道被人攻擊。最弊，不但是烏克蘭一次顏色革命，其他前蘇聯共和國都紛紛舉辦「有外國勢力介入」嘅顏色革命，所以你都唔好話情況唔嚴峻。
俄羅斯玩晒中亞洲
咁賣石油畀祖國對俄羅斯，又有乜用呢？早兩個月前，現任花旗國總統小布殊都同佢自己國民講過，用石油可以用到上癮。其實佢係講緊全世界嘅人。用同一邏輯，俄羅斯對石油天然氣公司賣能源嘅態度，有如十九世紀大英帝國對當年渣甸賣鴉片嘅態度一樣，最好搞到你哋全部上晒俄羅斯能源癮。歐洲政府𠵱家因為天然氣供應斷斷續續，全部都要聽聽話話，唔敢再喺啲前蘇聯地方搞搞震。到時祖國都好似歐洲一樣，中亞洲就會係俄羅斯玩晒。
噚日，我話拖咗幾年嘅跨中俄邊境油管可能會有驚喜。點知，真係有！一直以來，俄羅斯都要條油管去到俄羅斯太平洋岸線，最多會有一條支管去到華北大慶。𠵱家聽講話最新發展係，條油管直達大慶，不過條油管亦會喺邊境俄羅斯嗰邊，開條鐵路做支線運油到俄羅斯太平洋岸線。今次有咁嘅新思維，孫柏文都心服口服，金手指只可以篤個「勁」字！
孫柏文