《利字當頭》嘅任務係要為蘋果讀者披露市場上「利」之所在，點知今日橫睇豎睇，最終發覺香港原來一早回歸，甚至乎連市場遊戲規則都同祖國睇齊，大玩特玩政治市，所以利世民亦急急補習政治科，學習富特區色彩嘅資本主義為何物。
政制事務局林公話：「香港如果急於落實普選或取消功能界別，可能令香港走向福利主義的道路。」唔知頭唔知路者，仲以為特區政府好反對福利主義㖭！
點知另一邊廂，立法會政客辯論唐少嘅預算案。漁農界功能組別黃容根狠批冇按基本法為漁農業提供發展機會。教育界功能組別增加教育經費，同埋資助幼兒教學。旅遊界功能組別楊孝華就話，希望政府加快落實基建，配合業界的工作。呢個特區色彩嘅資本主義，畀利世民嘅啟示係，原來愈多功能組別票，就愈多功能福利。
如果普選等於福利主義，功能組別就等於「功能組別福利主義」，唔知林公怕唔怕嚇怕外資呢？唔使等林公答大家，利世民大膽同大家講句︰「一定會」不過，林公根本唔介意嚇怕外資，因為仲有中資！林公認真心繫家國！
「香港特區公司」
利世民有老友話，政府咁怕福利主義，不如試吓當普選等於將香港特區公司，一人一股，一股就一票。老友問︰「有邊間公司嘅小股東會日日諗住將間公司清盤呢？所以一人一票又點解一定會等於福利主義呢？」利世民就認為呢個想法非常漂亮，將普選概念簡單解釋清楚。
不過利世民就諗，如果呢間公司有股息派（退稅）都好啲，𠵱家特區管理層吓吓要我哋供股，再供落去真係會出現恐慌性拋售（移民），再唔係就開股東會換管理層，連主席都炒咗佢！
利世民